ნათია თურნავა: უფრო მეტად დაცულია კომპანია, თუ ინდუსტრიული წარმოება გადანაწილებული აქვს მსოფლიოში

არ დაგიმალავთ და ინვესტიციების მოზიდვა უკვე გართულებულია, - ამის შესახებ ეკონომიკის მინისტრმა, ნათია თურნავამ „ღია ეთერში“ განაცხადა.

მისი თქმით, როდესაც არის ზოგადად კრიზისი, როდესაც რაღაც პერიოდი შეწყდა ჩეულებრივი ტრადიციული ბიზნეს კავშირები, შეჩერდა პროდუქციის მიწოდება ტრადიციული ბაზრებიდან ტრადიციულ ბაზრებზე, ამის შემდეგ ბევრ კომპანიას ფინანსური პრობლემები დაუდგა, ამიტომ ინვესტორებს გაცილებით მეტი დრო სჭირდებათ და მეტი დარწმუნება, რომ აირჩიონ ესა თუ ის ქვეყანა.

„მაგრამ კარგია ის გლობალური ტენდენცია, რასაც ვხედავთ, რომ ინვესტორები ეძებენ მეტ დივერსიფიკაციას, ანუ ტრადიციული ინდუსტრიული ჰაბები, როგორიც არის თუნდაც ჩინეთი, ამ ვითარებამ დაგვანახა, რომ უფრო მეტად დაცულია კომპანია, თუკი არა მარტო ამ ბაზარზე აქვს თავისი ინდუსტრიული წარმოება, არამედ უფრო მეტად აქვს გადანაწილებული მსოფლიოში. ჩვენთვის ეს არის შესაძლებლობა დავარწმუნოთ ინვესტორები, რომ საქართველო არის ნომერი პირველი არჩევანი ასეთ დროს, საქართველო არის ქვეყანა, სადაც ერთ-ერთი საუკეთესო ბიზნესგარემოა. აქ შეუძლიათ დააფუძნონ, გადმოიტანონ თავისი წარმოებები, უვადოდ თავისუფალი შეთანხმების ვაჭრობის ფარგლებში ივაჭრონ ძალიან დიდი ნაწილთან მსოფლიოში, მათ შორის ევროკავშირთან და მათი ბიზნესი იქნება უფრო მეტად დაცული. ჩვენ კი მივიღებთ ახალ სამუშაო ადგილებს“, - განაცხადა ეკონომიკის მინისტრმა.