„საპარტნიორო ფონდის“ საინვესტიციო დეპარტამენტის ხელმძღვანელი: სასტუმრო ბიზნესში ფონდის საინვესტიციო პორტფელის ჯამური მოცულობა 120 მილიონი დოლარია

„საპარტნიორო ფონდისთვის“ სასტუმრო ბიზნესის და უძრავი ქონების მხარდაჭერა ერთ-ერთი ძირითადი მიმართულებაა. სახელმწიფო საინვესტიციო ფონდისთვის, ეკონომიკის პრიორიტეტულ სექტორებში, მნიშვნელოვანია ისეთი პროექტების მხარდაჭერა, რომლებიც გამოირჩევიან განვითარების დიდი პოტენციალით. როგორც გადაცემაში „ბიზნესი იმედზე“ „საპარტნიორო ფონდის“ საინვესტიციო დეპარტამენტის ხელმძღვანელმა, დიმიტრი ხორავამ აღნიშნა, სწორედ „საპარტნიორო ფონდის“ მეშვეობით ხდება კაპიტალის მოზიდვა ისეთი სტარტაპებისთვის, რომლებსაც უჭირთ დაფინანსების მოძიება და საბანკო პროდუქტების მიღება.

„ფონდი იწყებს და ახორციელებს ისეთ პროექტებს, რომლებსაც საწყის ეტაპზე ბანკი რისკიანად უყურებს. მხოლოდ მას შემდეგ, რაც დასრულდება მშენებლობა, ოპერირებას დაიწყებს და ბანკები ნახავენ, რომ ეს წარმატებული პროექტია, ამის შემდეგ ხდება ბანკების დაინტერესება. მხოლოდ ამის შემდეგ ხდება საპარტნიორო ფონდის ინვესტირებული თანხის რეფინანსირება და გასტუმრება. ფონდი ირჩევს ისეთ რეგიონს, სადაც ინფრასტრუქტურა განუვითარებულია და ახორციელებს ინვესტიციას. ამას მოყვება ადგილობრივების დასაქმება, უძრავ ქონებაზე ფასის ზრდა. ეს ასევე რეგიონებს მიმზიდველს ხდის სხვა ინვესტორებისთვის“, - აცხადებს „საპარტნიორო ფონდის“ საინვესტიციო დეპარტამენტის ხელმძღვანელი.

ამ ეტაპზე „საპარტნიორო ფონდს“ სასტუმროების კუთხით აქვს საკმაოდ დიდი პორტფელი. ძირითადი სასტუმროები განთავსებულია რეგიონებში. არის სასტუმროები, რომლებიც უკვე დასრულდა და ოპერირებაშია, შესაბამისად „საპარტნიორო ფონდი“ უკვე გამოვიდა იმ პროექტებიდან.

მისი ინფორმაციით, სასტუმრო ბიზნესში ფონდის საინვესტიციო პორტფელის ჯამური მოცულობა 120 მილიონი დოლარია შეგახსენებთ, რომ „საპარტნიორო ფონდი" 2011 წელს შეიქმნა სატრანსპორტო, ენერგეტიკისა და ინფრასტრუქტურის სფეროში არსებული მსხვილი სახელმწიფო საწარმოების კონსოლიდაციის ბაზაზე. ფონდის მთავარი დანიშნულებაა რამდენიმე სახელმწიფო საწარმოს აქტივების მართვა და ინვესტიციების წახალისება საინვესტიციო პროექტების განვითარების საწყის ეტაპზე თანამონაწილეობის გზით (კაპიტალში თანაინვესტირება, სუბორდინირებული სესხი და ა.შ.).