სავაჭრო პალატის პრეზიდენტი: ბიზნეს პროექტების მხარდაჭერა ოკუპირებულ ტერიტორიებზე მცხოვრებ მოსახლეობას დამატებით შემოსავალს მოუტანს

,,ძალიან მნიშვნელოვანია „მშვიდობის ფონდი“-ის მიერ ბიზნეს პროექტების მხარდაჭერა გამყოფ ხაზთან და ოკუპირებულ ტერიტორიებზე მცხოვრები მოსახლეობისთვის, რაც მისცემს შესაძლებლობას ამ ადამიანებს, დაიწყონ ვაჭრობა ერთმანეთში და გაუჩნდეთ დამატებითი ფულადი შემოსავალი“, - განაცხადა სავაჭრო პალატის პრეზიდენტმა გიორგი პერტაიამ დღეს, „მშვიდობის ფონდი უკეთესი მომავლისთვის“ შემაჯამებელ ღონისძიებაზე სიტყვით გამოსვლისას.

გიორგი პერტაიას განცხადებით, პროგრამას მოტივაციის ნაწილში არ ექნება პრობლემები და ეყოლება საკმაოდ ბევრი ბენეფიციარი, გამომდინარე იქიდან, რომ ოკუპირებულ ტერიტორიაზე მცხოვრები ჩვენი თანამემამულეები ბევრად მოტივირებულები არიან, იცხოვრონ ეკონომიურად უკეთ, რადგან ისინი საკმაოდ იზოლირებულნი არიან და ძალიან ბევრი სიკეთით, რომელსაც ჩვენ ვიღებთ თუნდაც ჯანდაცვის, განათლების კუთხით და ა.შ, ისინი სრულფასოვნად ვერ სარგებლობენ ადგილზე და უწევთ გამყოფი ხაზის გადმოკვეთა.

,,ისტორია აჩვენებს, რომ ნებისმიერ კონფლიქტში, ბიზნესი არის ადამიანებს შორის კომუნიკაციის აღდგენის ერთ-ერთი ყველაზე კარგი საშუალება, რადგან ვაჭრობა არ ჩერდება. არსებობს ძალიან ბევრი მაგალით მსოფლიოში, თუნდაც მოვიყვანოთ ერგნეთის მაგალითი ჩვენ შემთხვევაში.

რეალურად, ბიზნესის კეთება არის კომუნიკაცია იმისათვის, რომ კონფლიქტის შედეგად დაზარალებული საზოგადოება ერთმანეთს დაუახლოვდეს, საერთო ინტერესები გაჩნდეს და ბიზნესი თავიანთ სასიკეთოდ გამოიყენონ.

მათ აქვთ ინტერესი, რომ მოგება ნახონ და ეს არის საშუალება, სადაც ერთმანეთში თანხმდებიან. სწორედ ამიტომ, პალატა მხარს უჭერს ამ პროგრამის განხორციელებას და რეგიონული წარმომადგენლების, წევრების დახმარებით გამოვიყენებთ ჩვენს ხელთ არსებულ ყველა კონტაქტს მაქსიმალურად პროგრამის ხელშეწყობისთვის“, - აცხადებს გიორგი პერტაია.

„მშვიდობის ფონდი უკეთესი მომავლისთვის’’ გამყოფ ხაზთან და ოკუპირებულ ტერიტორიებზე მცხოვრები მოსახლეობისთვის, ასევე კომპანიებისთვის 5 000-დან 100 000 ლარამდე გრანტის გაცემის პროგრამას იწყებს. ფონდის დამფუძნებლები შერიგებისა და სამოქალაქო თანასწორობის საკითხებში სახელმწიფო მინისტრის აპარატთან ერთად, საქართველოს სავაჭრო-სამრეწველო პალატა და საპარტნიორო ფონდი არიან. პროგრამა USAID-ის მხარდაჭერით განხორციელდება.