ნიკოლოზ ჩიქოვანი: შრომის უსაფრთხოების სტანდარტების გაზრდის შედეგად, უბედური შემთხვევების რაოდენობა მინიმუმამდე შემცირდა

2019 წლის პირველი სექტემბრიდან ჭიათურაში, ქალაქის ტერიტორიაზე მანგანუმის მადნით და კონცეტრატით დატვირთული მძიმეწონიანი სატვირთო ავტომობილები აღარ გადაადგილდებიან. პრობლემა, რომელიც წლების განმავლობაში მუნიციპალიტეტში არსებობდა და ქალაქის დამტვერიანებას იწვევდა, „ჯორჯიან მანგანეზის“ მიერ გადაიჭრა. კომპანიამ თანამედროვე ტექნოლოგიებით მანგანუმის მადნის გადამამუშავებელი ახალი ქარხანა 3,4 ჰექტარზე ააშენა, ახალი პროექტის ჯამური ინვესტიცია დაახლოებით 20 მლნ დოლარია.

უახლოესი ტექნოლოგიებით აღჭურვილ ქარხანაში „ჯორჯიან მანგანეზის“ 250-მდე თანამშრომელია დასაქმებული. რა შეიცვალა, კონკრეტულად, ჭიათურაში ამ პერიოდის განმავლობაში და რა გეგმები აქვს, როგორც გარემოს დაცვის, ასევე, დასაქმებულთა შრომითი უფლებებისა და უსაფრთხოების გაუმჯობესების კუთხით? ამ და სხვა თემებზე გადაცემა „ბიზნესი იმედზე“ საუბრისას „ჯორჯიან მანგანეზი“-ს სპეციალურმა მმართველმა, ნიკოლოზ ჩიქოვანმა ისაუბრა.

„იყო ნიადაგის დაბინძურების და გაფუჭების პრობლემა, ასევე მდინარის დაბინძრების პრობლემა. ჩვენ შევიმუშავეთ გეგმა, ყველა პრობლემების ეტაპობრივად გადაჭრის. მდინარე „ყვირილაში“ არ უნდა ჩავიდეს გადამუშავებული ნარჩენები ანუ შლამები არამედ უნდა მოხდეს ამის დასაწყობება. ეს არის კონკრეტული გეგმა და გარემოსდაცვითი კუთხით ამ პროექტსაც მალე დავიწყებთ. შრომის უსაფრთხოებას, რაც შეეხება რა თქმა უნდა უმნიშვნელოვანესია, რადგან რისკის შემცველი ობიექტიებია. სამი წლის წინ შრომის ინსპექციის სამსახური უფრო გავაძლიერეთ და მივეცით დიდი უფლებები.“ - აცხადებს „ჯორჯიან მანგანეზი“-ს სპეციალური მმართველი.

„ჯორჯიან მანგანეზი“-ს მიერ სხვადასხვა სოციალურ პროექტებზე დახარჯული თანხა -ყოველწლიურად დაახლოებით 2 მილიონ ლარს შეადგენს. კომპანიამ მხოლოდ წელს 4 სტადიონი მოაწყო და შიდა საფეხბურთო მატჩების ტრადიცია აღადგინა. იგეგმება ჩოგბურთის კორტების მშენებლობა, რადგან ისტორიულად სწორედ ჭიათურის ტერიტორიაზე აშენდა ჩოგბურთის პირველი კორტი.

ჭიათურის მანგანუმით გამდიდრებული ფოლადი მანქანათ და გემთმშენებლობის ასევე სხვადასხვა დანიშნულების მქონე დანადგარების წარმოებაში გამოიყენება. ქართულ მეტალს დღეს საექსპორტო დანიშნულება აქვს, რაც ძირითადად ამერიკულ ბაზარს ამარაგებს. კომპანიას თავისი წილით ქვეყნის მთლიან ექსპორტში მეოთხე ადგილი უკავია.

დღეს საქართველოში „ჯორჯიან მანგანეზი“ რამოდენიმე მსხვილ საწარმოს ფლობს. ერთ-ერთია ჭიათურაში - მანგანეზის სამთო-გამამდიდრებელი კომბინატი და ზესტაფონში - ფეროშენადნობთა ქარხანა. ჭიათურაში აღნიშნული კომპანია მადანს 2007 წლიდან მოიპოვებს. პარალელურად, ქალაქში მუშაობს 40-მდე პატარა ე.წ. კოოპერატივი. ღია კარიერული პრინციპით მადნის მოპოვება საბჭოთა პერიოდიდან დაიწყო და დღემდე აქტიურად გრძელდებოდა, რის გამოც რეგიონიში დაბინძურებული იყო ატმოსფერული ჰაერი, მიწისქვეშა და სასმელი წყლები, სწორედ ამიტომ 2017 წლის მაისში, გარემოს დაცვის სამინისტროს მოთხოვნით, სასამართლომ „ჯორჯიან მანგანეზს“ სპეციალური სახელმწიფო მმართველი გარემოსთვის კატასტროფული ზიანის გამოსწორების, დასაქმებულთა შრომითი უფლებების და უსაფრთხოების გაუმჯობესების მიზნით დაუნიშნა. ნიკოლოზ ჩიქოვანს რეგიონში მდგომარეობის ეტაპობრივად გამოსწორება დაევალა.