სებასტიან მოლინეუსი: 144 ქვეყნიდან საქართველო იყო იმ ათს შორის, რომლებსაც ძალიან დაბალი მაჩვენებელი აქვთ ქრთამის მიმართულებით

მსოფლიო ბანკის საწარმოთა კვლევა ძალიან მნიშვნელოვანი კვლევაა, რომელმაც 1600-მდე სიო და სხვადასხვა კომპანიის წარმომადგენელი გამოკითხა და 144 ქვეყნიდან საქართველო იყო იმ ათს შორის, რომლებსაც ძალიან დაბალი მაჩვენებელი აქვთ ქრთამის მიმართულებით, - ამის შესახებ მსოფლიო ბანკის რეგიონულმა დირექტორმა სამხრეთ კავკასიაში, სებასტიან მოლინეუსმა „ქრონიკაში“ განაცხადა.

მისი თქმით, საქართველოში რეგულაციებს ნაკლები დრო ეთმობა, გადასახადების მიმართულება კარგად არის დარეგულირებული, ადმინისტრაციული პრობლემები ბიზნესმენებს დიდი რაოდენობით არ აქვთ.

„ეს კვლევის შედეგები ძალიან საინტერესოა. მინდა ვისაუბრო იმაზე, რომ სხვა ქვეყნებთან შედარებით ბიზნესგარემო საქართველოში ბევრად უფრო კარგად არის მოწყობილი. მარტივად რომ ვთქვათ, რეგულაციებს ნაკლები დრო ეთმობა, გადასახადების მიმართულება კარგად არის დარეგულირებული, ადმინისტრაციული პრობლემები ბიზნესმენებს დიდი რაოდენობით არ აქვთ. ძალიან ბევრი დადებითი თვისება გამოიკვეთა საქართველოსი, რომელიც მსოფლიო ბანკის საწარმოთა კვლევამ აჩვენა. რა თქმა უნდა, ინფრასტრუქტურის მიმართულებით ძალიან ბევრი ჩავარდნა აქვს ქვეყანას, მშენებლობის მიღების უფლებაც ცოტა დასახვეწია, მაგრამ ნამდვილად მწამს, რომ ეს მიმართულება გამოსწორდება. ჩვენ აღმოვაჩინეთ, რომ 1,3 პროცენტს ფირმებისა, მოსთხოვეს, რომ გადაეხადათ ქრთამი ოფიციალური პირებისთვის. ეს არის ძალიან დაბალი ციფრი, რადგან ევროპის სხვადასხვა ქვეყანაში ეს მაჩვენებელი 10 პროცენტს შეადგენს, ზოგან ეს მაჩვენებელი 12%-მდეც მატულობს და მინდა გითხრათ, რომ საქართველო ძალიან ვითარდება და გამოირჩევა ქრთამის აღების შემთხვევების სიმცირით და მოსყიდვის წნეხისგან თავისუფლების მიმართულებით“, - განაცხადა სებასტიან მოლინეუსმა.

სარეიტინგო კომპანია „S&P“-ის ანგარიშის მიხედვით, კორონავირუსის პანდემიის მიერ საქართველოს ეკონომიკისთვის მიყენებული მნიშვნელოვანი ზიანის მიუხედავად, სარეიტინგო კომპანიამ საქართველოს სუვერენული საკრედიტო რეიტინგი და პერსპექტივა უცვლელი დატოვა.

ამასთან, სარეიტინგო კომპანია „Fitch“-მა საქართველოს სუვერენული საკრედიტო რეიტინგი „BB“ დონეზე, ხოლო პერსპექტივა სტაბილურ მაჩვენებელზე დაადასტურა. სარეიტინგო კომპანიის შეფასებით, საქართველოს სუვერენული რეიტინგი „BB“ კატეგორიის ქვეყნების მედიანურ მაჩვენებელთან შედარებით გამყარებულია მაღალი მართველობის ხარისხით, მიმზიდველი საინვესტიციო და ბიზნეს გარემოთი და რეგიონული შოკებისადმი მაკროეკონომიკური მდგრადობით.