ეკონომიკის მინისტრი: ყველაფერს ვაკეთებთ, რომ ლარი დასტაბილურდეს

ხმაური და ისტერია, რომელიც ჩვენს ოპონენტებს აქვთ ატეხილი არ ეხმარება ლარის კურსის პრობლემის დაძლევას, - ამის შესახებ ეკონომიკის მინისტრმა ნათია თურნავამ ტელეკომპანია „იმედის“ ეთერში, გადაცემა „დღის ქრონიკაში“ განაცხადა.

ეკონომიკის მინისტრის განცხადებით, გლობალურმა პანდემიამ ტურიზმს დაარტყა, რომელიც ქვეყანაში ვალუტის მთავარი შემომტანია და როცა ამხელა კლება გვაქვს, ეს პრობლემა და გამოწვევაა.

„შევადაროთ რეგიონს, ეს ძალიან კარგია იმისთვის, რომ დავინახოთ სად რა ხდება. ლარი გაუფასურდა, სხვანაირად ვერ იქნებოდა, სავალუტო შემოდინება შეგვიმცირდა რაღაცა პერიოდი. იგივე რეგიონის ქვეყნები რომ ავიღოთ, იგივე თურქული ლირა, სამჯერ მეტად გაუფასურდა წლის დასაწყისიდან. რუსული რუბლი გაუფასურდა დაახლოებით ორჯერ მეტად. ქართული ლარის აზერბაიჯანულ მანათთან შედარება არასწორია, რადგან იქ არის ფიქსირებული, მთავრობის მიერ მკაცრად კონტროლირებადი კურსი. ჩვენთან არის თავისუფალი მცურავი კურსი და ყველაფერს ვაკეთებთ იმისთვის რომ ლარი დასტაბილურდეს“, - განაცხადა თურნავამ. .

მისი თქმით, რადგან ინფიცირებულთა რაოდენობა გაიზარდა, გაჩნდა მოლოდინი, რომ ბიზნესს ჩავკეტავთ და ამან დაარტყა კიდევ ლარის კურსს. „ეს მოლოდინები ჩვენ გავაქრწყლეთ. ბიზნესი არ ჩაიკეტება, ეკონომიკა განვითარდება, ლარის კურსი დასტაბილურდება“, - აღნიშნა თურნავამ.

რამდენიმე დღეა ლარს გაუფასურების ტენდენცია აქვს. 15 სექტემბრის ვაჭრობის შედეგად, საქართველოს ეროვნული ვალუტა აშშ როგორც დოლართან, ისე ევროსთან მიმართებით გაუფასურდა. ბოლო ერთი კვირის განმავლობაში კი, ეროვნულმა ვალუტამ დოლართან მიმართებით ღირებულების 2% დაკარგა.