კოოპერატივ „კოდის“ დამფუძნებელი: ევროპაში პოპულარულია გეოგერაფიული აღნიშვნის მქონე პროდუქციის წარმოება და რეალიზაცია, ამიტომ ნინოწმინდის თაფლს აქვს კარგი პერსპექტივა და შანსი ევროკავშირის ბაზარზე გასასვლელად

ნინოწმინდის თაფლი, ისევე როგორც ხვანჭკარა, ჭაჭა, თუშური გუდა, ჩურჩხელა, მაჭახელას თაფლი და სხვა საქართველოში დაცული ჯამში 53 გეოგრაფიულ აღნიშვნა, 1-ლი ოქტომბრიდან წარმოადგენს საერთო აქტივს მათ წარმოებაში და რეალიზაციაში ჩართული სუბიექტებისთვის.

ეს ნიშნავს, რომ აღნიშნული პროდუქტის განსაკუთრებული ხარისხი, თვისებები და რეპუტაცია, რომელიც განპირობებულია სამცხე-ჯავახეთის რეგიონისთვის დამახასიათებელი გარემო პირობებითა და ადამიანური ფაქტორით, აღიარებულია სახელმწიფო დონეზე.

გიორგი მერაბიშვილმა ოთხი წლის წინ, „საქპატენტის“ მიერ ჩატარებულ ცნობიერების ამაღლების ღონისძებაზე შეიტყო გეოგრაფიული აღნიშვნის შესახებ და გადაწყვიტა ნინოწმინდის თაფლის უნიკალურობას შესაბამისი ნიშანიც ჰქონოდა და ყველა მოთხოვნისა და სპეციფიკაციის დაკმაყოფილების საფუძველზე საქმე ბოლომდე მიიყვანა.

„ეს არის სასიხარულო ამბავი არა მხოლოდ ჩვენი კოოპერატივის წევრებისთვის, არამედ რეგიონში მოღვაწე მეფუტკრეებისთვის, რადგან ფართო გასაქანი და არეალი ეძლევა თაფლის ექსპორტის შესაძლებლობას. ევროპაში პოპულარულია გეოგერაფიული აღნიშვნის მქონე პროდუქციის წარმოება და რეალიზაცია. ამიტომ ნინოწმინდის თაფლს აქვს კარგი პერსპექტივა და შანსი ევროკავშირის ბაზარზე გასასვლელად“, - აცხადებს კოოპერატივი „კოდის“ დამფუძნებელი, გიორგი მერაბიშვილი.

კოოპერატივი „კოდი“ სამი სახეობის პროდუქტს აწარმოებს, მისი დაფასოება მხოლოდ მინის ქილებში ხდება. „ნინოწმინდის თაფლის“ მწარმოებელმა გიორგი მერაბიშვილმა გადაცემაში „ბიზნესი იმედზე“ აღნიშნა, რომ ჯერ მხოლოდ ადგილობრივ ბაზარზე არიან წარმოდგენილი.

ნინოწმინდის თაფლს აქვს პოტენციალი 500-დან 1000 ტონამდე მოგროვდეს სეზონზე, სწორედ ამიტომ გეორგაფიული აღნიშვნის მინიჭების შემდეგ, საერთაშორისო ბაზრებზე გასვლა მათი უახლოესი გეგმაა.