ეკატერინე მიქაბაძე: სავალუტო ფონდისა და მსოფლიო ბანკის წლიურ შეხვედრაზე ჩვენი რეგიონიდან არსებულ ვითარებაზე სასაუბროდ საქართველო მიიწვიეს, რაც ჩვენი მთავრობის ეკონომიკური ხედვის მართებულობის დასტურია

საერთაშორისო სავალუტო ფონდისა და მსოფლიო ბანკის ყოველწლიური შეხვედრის ფარგლებში, გაიმართა მაღალი დონის დისკუსია სავალუტო ფონდის მმართველ დირექტორსა და კავკასიისა და ცენტრალური აზიის რეგიონის ეკონომიკური სტრუქტურების ხელმძღვანელებს შორის, სადაც საუბარი შეეხო რეგიონში არსებულ გამოწვევებსა და ამ გამოწვევებთან გამკლავების მეთოდებს, - ამის შესახებ ინფორმაციას ეკონომიკისა და მდგრადი განვითარების სამინისტრო ავრცელებს.

მათივე ინფორმაციით, წლიური შეხვედრის ფარგლებში საფინანსო ორგანიზაციებმა ასევე გამართეს მაღალი დონის დიალოგი პანდემიის პირობებში ციფრული ტექნოლოგიების განვითარებისათვის ქვეყნების პოლიტიკის გაძლიერების და ამ მიმართულებით მიღწეული შედეგების შესახებ.

როგორც პირველ, ასევე მეორე დისკუსიაში მაგალითად მოყვანილი იყო საქართველო, როგორც რეგიონის ლიდერი ეკონომიკური სტაბილურობისა და სტრუქტურული რეფორმების განხორციელების მიმართულებით.

ეკონომიკისა და მდგრადი განვითარების მინისტრის პირველი მოადგილის, ეკატერინე მიქაბაძის განცხადებით, მნიშვნელოვანია, რომ რეგიონიდან, არსებულ ვითარებაზე სასაუბროდ მიწვეულ იქნა საქართველო.

„ეს საქართველოს კიდევ ერთი აღიარება და მისი მთავრობის ეკონომიკური ხედვის მართებულობის დასტურია. ჩვენი პარტნიორებისათვის საინტერესოა, როგორია საქართველოს ხელისუფლების მიერ დასახული გზები და როგორ შეიძლება იქნეს დაძლეული კრიზისი როგორც ქვეყანასა და რეგიონში, ისე გლობალურად,“ - აღნიშნა ეკატერინე მიქაბაძემ.

საერთაშორისო სავალუტო ფონდი, ყოველწლიური შეხვედრის ფარგლებში, მართავს მაღალი დონის დისკუსიებს თითოეულ რეგიონთან, სადაც წევრი ქვეყნები გამოთქვამენ საკუთარ მოსაზრებებსა და შეხედულებებს, როგორ უნდა მოხდეს ეკონომიკური აქტივობის სრულყოფილი აღდგენა პოსტპანდემიურ პერიოდში. გარდა ამისა, სავალუტო ფონდი, მსოფლიო ბანკთან თანამშრომლობით, ორგანიზებას უწევს მაღალი დონის დისკუსიას პრიორიტეტულ თემაზე - პანდემიიდან გამომდინარე, წელს საუბარი წარიმართა ციფრულ ტექნოლოგიებზე და ეროვნული მთავრობების ინიციატივებზე მისი განვითარების მიმართულებით.

მნიშვნელოვანია, რომ წელს სავალუტო ფონდისა და მსოფლიო ბანკის ობიექტივში საქართველო მოექცა, რაც კიდევ ერთი დადასტურებაა იმისა, რომ საქართველოს აქვს მაღალი რეპუტაცია საერთაშორისო საფინანსო ორგანიზაციებში, ხოლო საქართველოს მთავრობის ეკონომიკური ხედვა სამოდელოა მსოფლიოს არაერთი სხვა ქვეყნისთვის.