ბიზნესმენები მიხეილ სააკაშვილის დაუმორჩილებლობისადმი მოწოდებას არ ეთანხმებიან

ბიზნეს სექტორი მიხეილ სააკაშვილის დაუმორჩილებლობისკენ მოწოდებას ეხმაურება. ბიზნესმენების აზრით, ის, რისკენაც ყოფილი პრეზიდენტი უკრაინიდან მოსახლეობას მოუწოდებს საქართველოში სურს, ეკონომიკის კრიზისს გამოიწვევს. არასტაბილურ ეკონომიკურ და პოლიტიკურ გარემოს შექმნის, ინვესტორებს დააფრთხობს და ბიზნესს მნიშვნელოვან დარტყმას მიაყენებს. სფეროს წარმომადგენლებს მიაჩნიათ, რომ გამოხატვის უფლება ყველას აქვს, მაგრამ მნიშვნელოვანია სწორი ფორმის შერჩევა.

ჩვენი ეკონომიკისთვის დღეს ეს არის მიუღებელი უბრალოდ, იმიტომ რომ შეიძლება დააზიანოს და ავნოს ის სწორად გადადგმული, სწორად მართული ნაბიჯები პანდემიის დროს, ის კრიზისული მართვის უნარები, რომელიც გამოავლინა ჩვენი ქვეყნის მთავრობამ, მედიკოსებმა. ეს იქნება ამის განვითარების შენელება და პირიქით, ეს იქნება ქვევით სხვლა, ეს იქნება იმ ვერაგი ვირუსის გავრცელების საშუალება ერთი მხრივ, ხოლო მეორე მხრივ, ეს იქნება ეკონომიკისთვის ძალიან დიდი ზიანის მიმყენებელი“, - ფიქრობს ზურა ჩხაიძე - KWT-ჯგუფის დამფუძნებელი და გენერალური დირექტორი.

ამავე აზრზეა „ჯეოჰოსპიტალსის“ ქსელის სამეთვალყურეო საბჭოს ხელმძღვანელი. ნინო კობახიძე სააკაშვილის განცხადებას აგრესიულს უწოდებს.

„ეს არის სუფთა აგრესიული მოწოდება, რომ ხელი შეუშალოს ბიზნესს, ხელი შეუშალოს ადამიანებს. არც მიკვირს, იმიტომ რომ ყოფილი პრეზიდენტის მიერ არაერთი მარგინალური და აგრესიული განცხადებები, არის ხოლმე. ალბათ ერთადერთი მხოლოდ ის დარჩენია, რომ დაუმორჩილებლობა იყოს მთავარი მოტივი მისი პოლიტიკური ველის. რაც, რა თქმა უნდა, არასწორია. ბიზნესს ხელს შეუშლის, გამომდინარე იქიდან, რომ ნებისმიერი დესტაბილიზაცია, არეულობა, არაცივილური ფორმით პროტესტის გამოხატვა პირველ რიგში ქვეყნის საინვესტიციო პოლიტიკას ძალიან აზიანებს“, - მიაჩნია ნინო კობახიძეს.

ექსპრეზიდენტი სააკაშვილი საქართველოს მოქალაქეებს კიევიდან სოციალური ქსელით მოუწოდებს, დაარღვიონ კოვიდრეგულაციები და არ დაემორჩილონ კანონს. მიხეილ სააკაშვილი რამდენიმე დღის წინ თბილისში გამართულ აქციას ეხმაურება და წერს, რომ პროტესტი მასშტაბური უნდა გახდეს. ფესბუქ მიმართვით ყოფილი პრეზიდენტი მოქალაქეებს დაუმორჩილებლობისკენ მოუწოდებს და განმარტავს, რომ კანონის აღსრულებას, კერძოდ ჯარიმების გადახდას მოსახლეობამ უარი უნდა უთხრას.