ნათია თურნავა: 2020 წელს ადგილობრივი წარმოების ექსპორტი გაიზარდა

2020 წელს ადგილობრივი წარმოების ექსპორტი გაიზარდა და ეს მართლაც სასიხარულოა, - განაცხადა ეკონომიკისა და მდგრადი განვითარების მინისტრობის კანდიდატმა ნათია თურნავამ საქართველოს პარლამენტში კომიტეტების გაერთიანებულ მოსმენაზე სიტყვით გამოსვლისას.

მისი თქმით, მეხილეობის დარგში ექსპორტის მაჩვენებელმა რეკორდულ მაჩვენებელს მიაღწია.

„ამ დარგებს შორის არის მომპოვებელი ინდუსტრიის პროდუქცია, ეს არის სპილენძის მადნები და კონცენტრანტები და ძვირფასი ლითონები და კონცენტრანტები, მაგრამ ეს ის წელიწადია, როდესაც მხოლოდ ეს მომპოვებელი ინდუსტრიის პროდუქციის ექსპორტი არ გაიზარდა. ასევე გაიზარდა სოფლის მეურნეობის ექსპორტი და არა მარტო თხილი და სპირტიანი სასმელები, თუმცა თხილში გვაქვს 12%-იანი ზრდა და 3%-იანი ზრდა გვაქვს ღვინისა და ბრენდის ექსპორტის მიმართულებით, მაგრამ რეკორდულ მაჩვენებელს მიაღწია მეხილეობის დარგში ექსპორტის მაჩვენებელმა, მათ შორის იმის გამო რომ ჩვენ წლის განმავლობაში კარგად ვმართეთ პანდემია, განსაკუთრებით მაშინ, როდესაც სეზონი იყო ამ პროდუქციის მოყვანისა და მოსავლის აღების. ასევე, მოვახერხეთ ახალი ბაზრები მოგვეზიდა. კიდევ ერთი მნიშვნელოვანი მიმართულება არის ტექსტილის ნაწარმი, რომელიც ასევე ჩვენი შიდა წარმოების სამკერვალო ნაწარმია, რომლის ექსპორტიც ასევე გაიზარდა. ჩვენ პანდემიის დროსაც არ გაგვიჩერებია სამკერვალო ინდუსტრია და მათ შეძლეს, რომ სხვა, გლობალური კონკურენტები უკან ჩამოიტოვეს და მათი კონტრაქტები ამ პერიოდში თვითონ აიღეს“, - განაცხადა ნათია თურნავამ.

პარლამენტში მინისტრობის კანდიდატების მოსმენა დაიწყო.