ირაკლი კოვზანაძე: ვისი მუშაობის შედეგია 2020 წლის 2.4%-იანი ინფლაცია - სებ-ის, საქსტატის თუ მთავრობის?

ვისი მუშაობის შედეგია 2020 წლის 2.4%-იანი ინფლაცია - სებ-ის, საქსტატის თუ მთავრობის? - ამ კითხვით მიმართა პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ ეროვნული ბანკის პრეზიდენტ კობა გვენეტაძეს, რომელმაც დეპუტატების წინაშე 2020 წლის წლიური ანგარიში წარადგინა.

„ეროვნული ბანკის ძირითად ამოცანას და მიზანს ფასების სტაბილურობა წარმოადგენს. ანუ, ეროვნული ბანკია პასუხისმგებელი ინფლაციაზე (მთავრობას კი პასუხისმგებლობა ეკისრება ეკონომიკურ ზრდაზე, დასაქმებაზე და ა.შ.). საქსტატის მონაცემებით, 2020 წელს ინფლაციამ შეადგინა 2.4%, თუმცა მთელი 2020 წლის განმავლობაში ინფლაცია მიზნობრივ მაჩვენებელზე მაღლა იყო. ინფლაციამ პიკს აპრილში მიაღწია და 6.9% შეადგინა, ხოლო საშუალო წლიური 5.2% იყო. წლის ბოლოს, დეკემბერში ინფლაცია მკვეთრად 2.4%-მდე შემცირდა, რაც, ძირითადად, გამოწვეული იყო იმით, რომ „საქსტატმა“ მოქმედი მეთოდიკის საფუძველზე, ინფლაციის მაჩვენებელი შეამცირა ზამთრის თვეებში მთავრობის მიერ მოსახლეობის კომუნალური ხარჯების სუბსიდირების ნაწილით, ეს კი 1.9 პროცენტულ პუნქტს შეადგენდა. მე არ ვეხები ახლა ეს მეთოდიკა რამდენად სწორია, რადგან განსხვავებული მოსაზრებები არსებობს ამის ირგვლივ.

სხვანაირად, რომ ვთქვა - რომ არა მთავრობის მხრიდან კომუნალური ხარჯების სუბსიდირება და შემდეგ მეთოდიკაში მისი გამოკლება, ინფლაციის მაჩვენებელი ჩვენ გვექნებოდა, დაახლოებით, 5.2-5.3% ანუ ეროვნული ბანკის მიზნობრივ მაჩვენებელზე გაცილებით მეტი“, - განაცხადა გვენეტაძემ.

ამასთან სებ-ის პრეზიდენტმა ირაკლი კოვზანაძის კითხვას შემდეგი პასუხი გასცა: „კომუნალურების სუბსიდირების საჭიროების მიზეზი იყო პანდემია, რომელიც როგორც მთელ მსოფლიოში, ისე საქართველოში იყო, მაგრამ სუბსიდირება შეუძლებელი იქნებოდა, მთავრობის ეკონომიკურ გუნდს რომ არ ემუშავა და არ მოეზიდა ის დახმარება, რომელიც პანდემიის დაწყებიდან მალევე მიიღო; შემდეგ კი კომუნალური გადასახადების სუბსიდირება და მერე ინფლაციიდან მომდინარე ტვირთის შემსუბუქება შეძლო, რადგან ხალხმა იმ პროდუქტში უფრო ნაკლები გადაიხადა და ინფლაციის პრინციპიც გათვლაში ამ დანახარჯის შესვლაა“, - განაცხადა გვენეტაძემ.