ლაშა ხუციშვილი: ვიმედოვნებ, ერთთვიანი პერიოდი, რაც აქვს გაცხადებული „ენკას“ ხელშეკრულების შესაწყვეტად, საკმარისი იქნება კომპანიასთან გარკვეული შეთანხმების მისაღწევად

ვიმედოვნებ, ერთთვიანი პერიოდი, რაც აქვს გაცხადებული „ენკას“ ხელშეკრულების შესაწყვეტად, საკმარისი იქნება, რომ მოხდეს კომპანიასთან გარკვეული შეთანხმების მიღწევა, – ამის შესახებ საქართველოს ფინანსთა მინისტრმა ლაშა ხუციშვილმა განაცხადა.

მისივე თქმით, საქართველოს მთავრობა ყველაფერს გააკეთებს, რომ პროექტის განხორციელების პროცესი არ შეფერხდეს.

„პირველ რიგში, იმედს გამოვთქვამ, რომ ის პერიოდი, რა პერიოდიც აქვს გაცხადებული კომპანიას ხელშეკრულების შესაწყვეტად, თუ არ ვცდები, ერთთვიანი პერიოდია, საკმარისი იქნება, რათა მოხდეს კომპანიასთან გარკვეული შეთანხმების მიღწევა. რა თქმა უნდა, სურვილია, შეთანხმება გულისხმობდეს იმას, რომ კომპანიამ გააგრძელოს ეს პროექტი და დასრულდეს იმ ვადებში, რა ვადებიც იყო განსაზღვრული.

ეს პროექტი ძალიან მნიშვნელოვანია, შესაბამისად, საქართველოს მთავრობა ყველაფერს გააკეთებს, რომ პროექტის განხორციელების პროცესი არ შეფერხდეს და დადგენილ ვადებში დასრულდეს“, – განაცხადა ლაშა ხუციშვილმა.

რიონის ხეობაში „ნამახვანჰესის“ პროექტის განხორციელებასთან დაკავშირებით პროტესტის ძირითადი საგანი ინვესტორისთვის 99 წლით მიწის სარგებლობაში გადაცემა და გარემოსდაცვითი საკითხები იყო.

„ენკა“ საქართველოს სახელმწიფოთან არსებულ ხელშეკრულებას წყვეტს - 800-მილიონიანი ჰიდროელექტროსადგური აღარ აშენდება. კომპანიამ გეგმის შესახებ საქართველოს ეკონომიკის სამინისტროს აცნობა.