უნგრეთის მთავრობის გადაწყვეტილებით, საქართველო შევიდა იმ ქვეყნების სიაში, საიდანაც, გარკვეული პროფესიების მოქალაქეები, განსაზღვრული დროით, ჩასვლასა და დასაქმებას შეძლებენ

უნგრეთის მთავრობამ საქართველო შეიყვანა იმ ქვეყნების სიაში, რომელთა მოქალაქეებსაც შესაძლებლობა ექნებათ, დროის განსაზღვრული პერიოდით, გამარტივებული წესით, უნგრეთში სამუშაო ნებართვა მიიღონ. ამის შესახებ საქართველოსა და უნგრეთის საგარეო საქმეთა მინისტრების შეხვედრაზე გახდა ცნობილი, რომელიც ბუდაპეშტში, ილია დარჩიაშვილის სამუშაო ვიზიტის ფარგლებში გაიმართა.

„მოხარული ვარ, რომ უნგრეთში, საგარეო საქმეთა მინისტრის რანგში პირველ ვიზიტით ვარ და მადლობას ვუხდი ჩემს კოლეგას გულთბილი მასპინძლობისთვის. დღევანდელმა შეხვედრამ მოგვცა შესანიშნავი შესაძლებლობა ნაყოფიერი დიალოგის გასაგრძელებლად. მოხარული ვარ, რომ საქართველოს მოქალაქეებისთვის დასაქმების გამარტივებული მექანიზმის დანერგვა უნგრეთის ყველაზე მოთხოვნად სექტორებში არის ჩვენი ორმხრივი დღის წესრიგის ერთ-ერთი მთავარი თემა. მადლობას ვუხდი უნგრელ პარტნიორებს მზადყოფნისთვის, რომ საქართველო შევიდეს იმ ქვეყნების სიაში, რომლებიც სარგებლობენ გამარტივებული პროცედურით. ეს ჟესტი ჩვენი ქვეყნისადმი უნგრეთის ურყევი მხარდაჭერის კიდევ ერთი მაჩვენებელია. ვიმედოვნებ, რომ შესაბამისი საკანონმდებლო ცვლილებები უახლოეს მომავალში დასრულდება. ჩვენ ყურადღება გავამახვილეთ ეკონომიკურ განზომილებაზე და მივესალმებით ორმხრივი ვაჭრობის სტაბილურ ზრდას. მიუხედავად დადებითი ტენდენციისა, ჩემს კოლეგასთან ერთად ვიზიარებთ ხედვას, რომ ჩვენ გვჭირდება სავაჭრო ბრუნვის კიდევ უფრო გაზრდა. დარწმუნებული ვარ, რომ ერთობლივი ეკონომიკური კომისიის მომავალი სხდომა განიხილავს ეკონომიკური ურთიერთქმედების გაღრმავების პერსპექტივებს. ჩვენ ასევე უდიდეს მნიშვნელობას ვანიჭებთ ტურიზმის ხელშეწყობას და მივესალმებით ქუთაისის აეროპორტიდან კომპანია „ვიზეარის“ მიერ ფრენების ზრდას. მინდა ხაზგასმით აღვნიშნო, რომ განათლების სფეროში თანამშრომლობა წარმატების ნამდვილი მაგალითია. ჩვენ უაღრესად ვაფასებთ უნგრეთის მიერ ქართველი სტუდენტებისთვის სტიპენდიების გამოყოფას და მოუთმენლად ველით ამ მიმართულებით თანამშრომლობის გაძლიერებას. საქართველოს ევროკავშირში ინტეგრაცია ჩვენი საუბრის ერთ-ერთ ძირითად საკითხს წარმოადგენდა. საქართველოს ევროპული პერსპექტივის აღიარება ისტორიული ფაქტია, რომლითაც ევროკავშირმა დაადასტურა, რომ საქართველო ევროპული სახელმწიფოა და ის ევროკავშირის წევრი გახდება. ეს არის წლების განმავლობაში მიღწეული პროგრესის, ასევე საქართველოსა და ევროკავშირს შორის დღეს არსებული მაღალი დონის ინტეგრაციის აღიარება“, - განაცხადა ილია დარჩიაშვილმა.

უნგრეთის საგარეო საქმეთა მინისტრმა, პიტერ სიიარტო საქართველოსა და უნგრეთს შორის გააქტიურებულ ეკონომიკურ ურთიერთობებს დადებითად აფასებს.

„უნგრეთის მთავრობის გადაწყვეტილებით, საქართველო შევიდა იმ ქვეყნების სიაში, საიდანაც მოქალაქეებს შეეძლებათ გარკვეულ პროფესიებით, განსაზღვრული დროით ჩამოსვლა უნგრეთში და დასაქმება. ასევე მოხარული ვარ, რომ საქართველოსა და უნგრეთს შორის იზრდება სავაჭრო ბრუნვა და მიმდინარე წელს ეს მაჩვენებელი გაორმაგებულია“, - განაცხადა სიიარტომ.