imedi /  12 სექტემბერი 2017, 11:11 / სანდო წყარო

თუშეთის 24 სოფელსა და 4 ხეობაში ინტერნეტი უკვე ხელმისაწვდომია

თუშეთი

თუშეთის 24 სოფელსა და 4 ხეობაში ინტერნეტი უკვე ხელმისაწვდომია. პროექტი ააიპ „თუშეთის განვითარების ფონდმა“ საერთაშორისო ორგანიზაცია The Internet Society-სთან ერთად განახორციელა. ინფორმაციას ეკონომიკის სამინისტრო ავრცელებს.

თუშეთში ინტერნეტიზაციის უკვე დასრულებულ სამუშაოებს ეკონომიკისა და მდგრადი განვითარების მინისტრის მოადგილე გაეცნო. გიორგი ჩერქეზიშვილმა მხარის გუბერნატორთან, კომუნიკაციების ეროვნული კომისიის, „თუშეთის განვითარების ფონდისა“ და ISOC-ს წარმომადგენლებთან ერთად შესაბამისი ინფრასტრუქტურა დაათვალიერა და ადგილობრივ მოსახლეობასა და ბიზნესოპერატორებს შეხვდა. 

თუშეთში ამ დროისთვის უკვე დამონტაჟებულია 7 ანძა, მონიშნულია სატრანზიტო წერტილები: სოფელ რუისპირის ანძა, რომელთანაც მოყვანილია ოპტიკური ხაზი (კომპანია „ფრინეტი,“ კახეთი) და აბანოს უღელტეხილი, სადაც დამონტაჟებულია უფასო ინტერნეტის დაშვების წერტილი.

5 მგბ/წმ სიმძლავრის ინტერნეტის ფასი 25 ლარია. პირველ ეტაპზე ინტერნეტის ქსელით თუშეთის სოფელი ომალო დაიფარა, რადგან აქ უფრო მეტი ადამიანი ცხოვრობს და შედარებით მეტი საოჯახო სასტუმროა.

ISOC-არაკომერციული ორგანიზაცია, რომლის ძირითადი ფუნქცია ინტერნეტის განვითარების ხელშეწყობა და მისი ხელმისაწვდომობის უზრუნველყოფაა. პროექტის საერთო ღირებულება 40 000 დოლარი და 20 500 ლარია.

კომენტარები ()