საქართველოს ბანკის გენერალური დირექტორის წლიური ხელფასი 3 მილიონ ლარზე მეტია

„საქართველოს ბანკის“ ყოფილმა გენერალურმა დირექტორმა მურთაზ კიკორიამ 2015 წელს, ხელფასის სახით, 3 133 280 ლარი და 86 თეთრი აიღო. კიკორიას შემოსავლებისა და ხარჯების შესახებ მონაცემებს საჯარო სამსახურის ბიურო აქვეყნებს. 

ფინანსები ბანკირს, ძირითადად, „საქართველოს ბანკსა“ და „თიბისი ბანკში“ აქვს განთავსებული.

ხარჯებს შორის ფიქსირდება შვილისთვის მადრიდში ბინის ყიდვა (500 ათასი ევრო) და მისი რემონტი (182 785 ევრო). ქველმოქმედებას კი „საქართველოს ბანკის“ ყოფილმა ხელმძღვანელმა 55 ათასი ლარი მოახმარა.

მურთაზ კიკორია პარლამენტმა 2016 წლის 1 დეკემბერს ეროვნული ბანკის საბჭოს წევრად დაამტკიცა. კიკორია ეროვნული ბანკის ვიცეპრეზიდენტია.