ლადო პაპავა ევროპარლამენტის მორიგ რეზოლუციაზე: ეს არის პრაქტიკულად კომპლექსური შეტევა ქართულ სახელმწიფოზე, სამწუხაროა და თან გაუგებარი

სამწუხაროდ ეს არის ფართომასშტაბიანი შეტევა ქართულ სახელმწიფოზე და არ ითვალისწინებს ეუთო ოდირის დასკვნას იმასთან დაკავშირებით, რომ არჩევნები პრაქტიკულად ლეგიტიმურად უნდა ჩაითვალოს, - ასეთ შეფასებას აკეთებს აკადემიკოსი ლადო პაპავა ევროპარლამენტის მორიგ რეზოლუციაზე. პაპავა მიიჩნევს, რომ ის დასკვნები, რაც კეთდება ბრიუსელიდან არის მიკერძოებული. აკადემიკოსის აზრით, მიმდინარე რეზოლუცია არის ასევე შეტევა ქვეყნის დამოუკიდებელ ინსტიტუტზე, ქვეყნის ეროვნულ ბანკზე და მის ხელმძღვანელზე.

„ევროპარლამენტის მორიგი რეზოლუცია ეს არის ფართომასშტაბიანი შეტევა საქართველოს სახელმწიფოზე. სამწუხაროდ ის არ ითვალისწინებს ეუთოს შედეგებს, რომელმაც პრაქტიკულად აღიარა საქართველოში არჩევნები და რადგანაც არ აღიარებს ამას, აქედან გამომდინარე კეთდება შესაბამისი დასკვნებიც. რაც შეეხება საქართველოს ეროვნული ბანკის და მისი ხელმძღვანელის მოხვედრას ამ რეზოლუციაში, ეს აბსოლუტურად გაუგებარია. თუნდაც იმიტომ, რომ სებ-ი როგორც იქნა წელში გაიმართა და იქნა არჩეული ეროვნული ბანკის საბჭო. სებ-ის ხელმძღვანელმა, ქალბატონმა ნათია თურნავამ მილოცვები მიიღო სხვადასხვა წარმომადგენლობებიდან. განსაკუთრებით აღსანიშნავია ის მილოცვა, რომელიც მან მიიღო პრეზიდენტად არჩევასთან დაკავშირებით საერთაშორისო სავალუტო ფონდიდან, რომელიც გამოთქვამს მზაობას, რომ საქართველოსთან გააგრძელოს საქმიანობა. ამ ფონზე სებ-ის და მისი ხელმძღვანელის გათვალისწინება და არა მარტო მისი, იქ ბევრი ისეთი გვარიცაა, აბსოლუტურად გაუგებარია რატომ მოხვდნენ, ეს არის პრაქტიკულად კომპლექსური შეტევა ქართულ სახელმწიფოზე. სამწუხაროა და თან გაუგებარი“, - ამბობს ლადო პაპავა.

მისივე თქმით, აღნიშნული რეზოლუცია, რომელიც მიღებულია ევროპარლამენტის მიერ უკვე არის ზეწოლა ქვეყნის ეკონომიკაზეც და მის ვალუტაზეც.

„მთელი პრობლემა იმაში მდგომარეობს, რომ საქართველოს ეკონომიკაში რაიმე ფუნდამენტური ფაქტორი, რომელიც მოასწავებს თუნდაც ლარის უარყოფით ტენდენციებს, ან ეკონომიკურ პრობლემებს - ასეთი ფუნდამენტური პრობლემები არ არსებობს. რაც სირთულეებია შექმნილი საქართველოს ეკონომიკაში და განსაკუთრებით ლართან მიმართებაში ეს არის მხოლოდ და მხოლოდ პოლიტიკური ზეწოლის შედეგი. ეჭვი არ მეპარება, რომ ის გვარები რომელიც შეტანილია რეზოლუციაში არის საქართველოდან გაგზავნილი და ერთ-ერთი გზა, ებრძოლონ ქართულ სახელმწიფოს გადის მის ეროვნულ ვალუტაზე. ნუ დაგვავიწყდება, რომ ვინც არ უნდა იყოს ხელისუფლებაში ყველა უნდა გაუფრთხილდეს ეროვნულ ვალუტას - ლარს, იმიტომ, რომ ის არ ეკუთვნის რომელიმე მთავრობას, რომელიმე ცენტრალურ ბანკს. ის ეკუთვნის სრულიად საქართველოს და ყველამ უნდა იზრუნოს მის სტაბილურობაზე“, - აცხადებს პაპავა.

აკადემიკოსი აცხადებს, რომ პრობლემა იმაშია, რომ მოსახლეობისთვის დღეს ყველაზე გრძნობადი და სენსიტიური ლარის გაცვლითი კურსია.

„აქედან გამომდინარე, როცა ბრძოლა არის ხელისუფლების წინააღმდეგ, ვიღაცების ინტერესშია, რომ ლარი იყოს არასტაბილური და იყოს გაუფასურებული. ეს, მათი აზრით, მისცემს დამატებით შესაძლებლობას, რომ იყვნენ წარმატებულები ხელისუფლებასთან ბრძოლაში და ვერ ხვდებიან, რომ ბრძოლა ხელისუფლებასთან კი არ იქნება, ეს იქნება ბრძოლა ქვეყანასთან. ხაზს ვუსვამ, რომ ლარი არის ყველასი. ეს არის ქვეყნის ეროვნული ვალუტა და მას უნდა გაფრთხილდეს ყველა“, - აცხადებს ლადო პაპავა.