გიორგი ვოლსკი გახარიაზე: ჩორჩანაში საგუშაგოს გახსნამ განაპირობა საპირისპირო ქმედებები რუსეთის ფედერაციის მხრიდან და მძიმე შედეგი მივიღეთ - მისი ეს ნაბიჯი აბსოლუტურად შეუთანხმებელი იყო ხელისუფლების შესაბამის რგოლებთან

პროკურატურა ფაქტებით უნდა ხელმძღვანელობდეს და მტკიცებულებათა ერთობლიობამ უნდა განაპირობოს საბოლოო დასკვნა, რომელსაც გამოძიება გამოიტანს, - განაცხადა საქართველოს პარლამენტის პირველმა ვიცე სპიკერმა გიორგი ვოლსკიმ გიორგი გახარიას საქმის შესახებ.

მისი შეფასებით, გახარიას ნაბიჯებმა მძიმე შედეგები მოიტანა ორივე მიმართულებით, რომლებზეც ყოფილი პრემიერის მიმართ სისხლის სამართლებრივი დევნა დაიწყო.

„პოლიტიკური გადმოსახედიდან რასაკვირველია, ყველა ვხედავთ, რომ ჩორჩანაში საგუშაგოს გახსნამ განაპირობა საპირისპირო ქმედებები რუსეთის ფედერაციის მხრიდან და მძიმე შედეგი მივიღეთ. მაგრამ კიდევ ერთი თემა წამოიჭრა ამ შემთხვევაში, როდესაც მისი ეს ნაბიჯი აბსოლუტურად შეუთანხმებელი იყო შესაბამის სტრუქტურებთან, ხელისუფლების შესაბამის რგოლებთან. ე.ი. აქ სხვა მიზანი იყო ჩადებული. შეიძლება, ეს ფაქტად ვერ იყოს მოტანილი, მაგრამ შედეგი ძალიან მძიმეა, ისევე როგორც ის პოლიციელები, რომლებიც საათების განმავლობაში იტანდნენ შეურაცხყოფას და ფიზიკურ შემოტევას - ცემას, გატაცებებს, დამცირებას, ესეც გარკვეული მიზნით იყო ორგანიზებული, თავი რომ დავანებოთ იმ მძიმე შედეგებს, რაზეც სტრასბურგის სასამართლო დამატებით გამოძიებას გვავალებს“, - განაცხადა გიორგი ვოლსკიმ.

საქართველოს პროკურატურამ 2019 წლის 20-21 ივნისის და ჩორჩანას ეპიზოდებზე გიორგი გახარიას მიმართ სისხლის სამართლებრივი დევნა დაიწყო.