ვახტანგ ცინცაძე Fitch-ის მიერ საქართველოს სუვერენული საკრედიტო რეიტინგის გაუმჯობესებაზე: ეს არის სიგნალი როგორც ადგილობრივი, ისე საერთაშორისო ინვესტორების მიმართ, რომ ქვეყნის ეკონომიკის მიმართ მოლოდინები არის პოზიტიური

ეს არის სიგნალი როგორც ადგილობრივი, ისე საერთაშორისო ინვესტორების მიმართ, რომ ქვეყნის ეკონომიკის მიმართ მოლოდინები არის პოზიტიური, - განაცხადა გადაცემაში „დღის ქრონიკა“ ეკონომიკისა და მდგრადი განვითარების მინისტრის მოადგილემ ვახტანგ ცინცაძემ.

მან ამგვარად უპასუხა წამყვანის კითხვას საერთაშორისო სარეიტინგო კომპანია Fitch Ratings-ის მიერ საქართველოს სუვერენული საკრედიტო რეიტინგის პერსპექტივის „სტაბილურამდე“ გაუმჯობესების შესახებ.

მინისტრის მოადგილის თქმით, Fitch Ratings-ის ეს შეფასება ნიშნავს, რომ საქართველომ იმაზე უფრო მაღალი მედეგობა აჩვენა გეოპოლიტიკური თუ სხვა ეკონომიკური შოკების მიმართ, ვიდრე ამას თავად საკრედიტო-სარეიტინგო სააგენტო ელოდა.

„ასევე, ეს არის საქართველოს აღიარება, როგორც მდგრადი ეკონომიკის და იმისა, რომ საქართველოს ყველა ფუნდამენტური მაკროეკონომიკური პარამეტრი არის ჯანსაღი. რეიტინგის პერსპექტივის გაუმჯობესება ნიშნავს, რომ როგორც მთავრობას, ასევე კერძოდ სექტორს აქვს შესაძლებლობა, უფრო შეღავათიანად მოიზიდონ ფინანსური რესურსები ქვეყნის ეკონომიკაში. ეს არის კიდევ ერთი წინგადადგმული ნაბიჯი ქვეყნის საკრედიტო რეიტინგის გაუმჯობესების მიმართულებით, რასთან დაკავშირებითაც საქართველოს მთავრობა აქტიურად მუშაობს. ჩვენ პერმანენტულად ვახორციელებთ შეხვედრებს საკრედიტო სარეიტინგო კომპანიებთან და განვიხილავთ, როგორც მიმდინარე ეკონომიკურ პარამეტრებს ასევე ვაანალიზებთ სამომავლო პერსპექტივებს და ეკონომიკურ პროგნოზებს”, - განაცხადა ვახტანგ ცინცაძემ.

ეკონომიკური ზრდის პროგნოზის გაუმჯობესების შესახებ კი მინისტრის მოადგილემ აღნიშნა, რომ პროგნოზების გაუმჯობესება არ არის მხოლოდ სტატისტიკა.

„ეს ნიშნავს, რომ საქართველო საერთაშორისო ეკონომიკურ რუკაზე იმყარებს სტაბილური, მზარდი და პერსპექტიული ქვეყნის იმიჯს. ფაქტობრივად, ყველა წამყვანმა საერთაშროისო საფინანსო ინსტიტუტმა, ისევე როგორც ევროკომისიამ, მნიშვნელოვნად გააუმჯობესა საქართველოს ეკონომიკური ზრდის პროგნოზი. ეს კიდევ ერთხელ ადასტურებს და ინვესტორებისთვის სიგნალია, რომ საქართველოს ეკონომიკა იზრდება იმაზე უფრო სწრაფად, ვიდრე ამას საერთაშორისო საფინანსო ინსტიტუტები ელიან. ეს განპირობებულია იმ სწორი და თანმიმდევრული პოლიტიკით, რაც საქართველოს მთავრობას გააჩნია”, - განაცხადა მინისტრის მოადგილემ.

საკრედიტო სააგენტო Fitch-მა საქართველოს სუვერენული რეიტინგი BB დონეზე დაადასტურა და პერსპექტივა “სტაბილურამდე” გააუმჯობესა. 2025 წლის საქართველოს ეკონომიკური ზრდის პროგნოზს კი Fitch-ი 5.6%-დან 7.3%-მდე აუმჯობესებს, ხოლო 2026 წლის პროგნოზს 5.2%-დან 5.3%-მდე ზრდის. ამასთან, სააგენტო ელის, რომ 2027 წელს ქვეყნის ეკონომიკა 5%-ით გაიზარდება.