თამარ იოსელიანი საფრანგეთის მანქანათმშენებლობის კომპანიის „ალსტომის“ მმართველ დირექტორს შეხვდა

ეკონომიკისა და მდგრადი განვითარების მინისტრის მოადგილე თამარ იოსელიანი საფრანგეთის მსხვილი მანქანათმშენებელი კომპანიის „ალსტომის“ მმართველ დირექტორს დასავლეთ და ცენტრალურ აზიაში ჟერომ ბოიეს შეხვდა.

გაცნობით შეხვედრაზე ქართულმა მხარემ ყურადღება გაამახვილა საქართველოში მიმდინარე სატრანსპორტო ინფრასტრუქტურულ პროექტებზე, მათ შორის, რკინიგზის მოდერნიზაციის პროცესზე, რომელიც ასევე მოიცავს რკინიგზის სავაგონე შემადგენლობისა და სალოკომოტივო პარკის განახლებას. როგორც მინისტრის მოადგილემ განაცხადა, საქართველოს მთავრობა მნიშვნელოვან ნაბიჯებს დგამს ქვეყნის სატრანსპორტო - ლოგისტიკური სექტორის განვითარებისა და შუა დერეფნის კონკურენტუნარიანობის ამაღლების მიზნით.

„ალსტომის“ მმართველ დირექტორთან შეხვედრას წინ უძღოდა საქართველოს ეკონომიკისა და მდგრადი განვითარების მინისტრის მარიამ ქვრივიშვილის შეხვედრა საფრანგეთის ტრანსპორტის მინისტრ ფილიპ ტაბაროსთან, რომლის დროსაც მხარეებმა საქართველოს ტრანსპორტისა და ლოგისტიკის სექტორებში ფრანგული კომპანიების მონაწილეობისა და ინვესტიციების განხორციელების შესაძლებლობები განიხილეს.

შეხვედრაში ასევე მონაწილეობდა სს „საქართველოს რკინიგზის“ გენერალური დირექტორი ლაშა აბაშიძე.