რევაზ სოხაძე: ინფრასტრუქტურული პროექტები ეკონომიკურ ზრდაში დიდ წვლილს შეიტანს

„ქვეყნის ეკონომიკის პირველი კვარტალის ორნიშნა ზრდაში, ალბათ, ინფრასტრუქტურის მშენებლობასაც აქვს თავისი წილი ამ შედეგში და ჩვენ გარანტიას ვიძლევით, რომ ამ მიმართულებით ძალიან ბევრი ახალი, საინტერესო პროექტი დაიწყება. ეს პროექტები იქნება როგორც ფუნქციურად მნიშვნელოვანი, ასევე ქვეყნის ეკონომიკური ზრდისთვის გადამწყვეტი,“ - განაცხადა ინფრასტრუქტურის მინისტრმა რევაზ სოხაძემ გადაცემაში „ბიზნეს ინსაიდერი“ ახალ პროექტებზე საუბრისას.

მისი თქმით, ამ ეტაპზე აქტიურად მიმდინარეობს პროექტირებების პროცესი, რაც გარკვეულ დროს მოითხოვს, თუმცა საბოლოოდ უზრუნველყოფს მშენებლობის პროცესში შეფერხებების მინიმუმამდე დაყვანას.

„სრულფასოვანი პროექტის ჩამოყალიბება ნიშნავს ნაკლებ შეფერხებას მშენებლობისას, რაც ამ სფეროში უმნიშვნელოვანესია. ჩვენ ძალიან დიდი მიწოდება გვექნება სამშენებლო კომპანიებისთვის და მინდა მათაც მოვუწოდო, რომ მზად იყვნენ ამ გამოწვევისთვის“,- აღნიშნა ინფრასტრუქტურის მინისტრმა.

რევაზ სოხაძის თქმით, მასშტაბური ინფრასტრუქტურული პროექტების დაწყება ქვეყნის ეკონომიკურ ზრდაში მნიშვნელოვან წვლილს შეიტანს.

„ჩვენ გვჯერა, რომ ამ მიმართულებით ჩვენი მუშაობა კიდევ უფრო გააძლიერებს ეკონომიკურ პროგრესს და შექმნის ახალ შესაძლებლობებს როგორც ბიზნესისთვის, ისე ქვეყნისთვის მთლიანად“, - განაცხადა ინფრასტრუქტურის მინისტრმა.