მარიამ ქვრივიშვილი: აზერბაიჯანთან წარმატებით დავასრულეთ რამდენიმეთვიანი მოლაპარაკებები და გავაფორმეთ ისტორიული შეთანხმება ენერგეტიკის სფეროში თანამშრომლობაზე, რომელიც, მათ შორის, გაზის სექტორში 20-წლიან ხელშეკრულებას გულისხმობს

აზერბაიჯანთან გავაფორმეთ უმნიშვნელოვანესი შეთანხმებების პაკეტი, რომელიც გააღრმავებს ორ ქვეყანას შორის სავაჭრო-ეკონომიკურ ურთიერთობებს და ახალ ეტაპზე გადაიყვანს ორ ქვეყანას შორის სტრატეგიულ თანამშრომლობას, - განაცხადა ბაქოში ეკონომიკის და მდგრადი განვითარების მინისტრმა, მარიამ ქვრივიშვილმა.

მინისტრის თქმით, შეთანხმება, თავისი შინაარსით, დაახლოებით ექვს ძირითად მიმართულებას გულისხმობს.

„პირველი, ეს არის ენერგეტიკის სექტორი და მეორე - ტრანსპორტის მიმართულება. აზერბაიჯანი წლების განმავლობაში ენერგეტიკის სექტორში ჩვენი სტრატეგიული პარტნიორია. სასიხარულოა, რომ ბოლო თვეების განმავლობაში მიმდინარე მოლაპარაკებები წარმატებით დასრულდა და დღეს გავაფორმეთ ისტორიული შეთანხმება ენერგეტიკის სექტორში თანამშრომლობაზე. ეს გახლავთ გაზის სექტორში 20-წლიანი ხელშეკრულება და თანამშრომლობა“ - აღნიშნა მარიამ ქვრივიშვილმა.

მინისტრის განცხადებით, გაგრძელდა მოქმედი ხელშეკრულება, რომლის ვადა 2026 წელს იწურება და რომელიც საქართველოსთვის სოციალური გაზის მიწოდებას უზრუნველყოფს.

„რეალურად გაფორმდა ახალი ხელშეკრულება, რაც უდიდეს წვლილს შეიტანს ჩვენი ქვეყნის ენერგოუსაფრთხოების უზრუნველყოფაში. ამ შეთანხმების ნაწილია ელექტროენერგეტიკაში თანამშრომლობა, რომელიც გულისხმობს იმპორტს, ტრანზიტს, ისევე როგორც სხვა არაერთ მიმართულებას. შეთანხმების ფარგლებში ჩვენ, ერთი მხრივ, ვაგრძელებთ და ვაძლიერებთ სავაჭრო-ეკონომიკურ ურთიერთობებს, თუმცა, მეორე მხრივ, აღნიშნული შეთანხმებები კიდევ უფრო მეტად გაამყარებს საქართველოს, როგორც ტრანზიტული ჰაბის ფუნქციას როგორც გაზის, ისევე ელექტროენერგეტიკის თვალსაზრისით“, - განაცხადა მარიამ ქვრივიშვილმა.