მერიამ დედაქალაქის გენგეგმაში არსებული ხარვეზები გამოაქვეყნა

თბილისის მერიის არქიტექტურის სამსახურმა დედაქალაქის მიწათსარგებლობის გენერალურ გეგმაში არსებული ხარვეზების შესახებ ინფორმაცია გამოაქვეყნა.

მერიის ცნობით, „სითი ინსტიტუტი საქართველოს" მიერ წარმოდგენილ გენერალურ გეგმაში საკრებულოს მიერ შეთანხმებული განაშენანების რეგულირების გეგმები სრულად არ არის ასახული და შესაბამისად ადევს არაადეკვატური ზონა.

შეფასების დოკუმენტში წერია, რომ უგულებელყოფილია მწვანე ქალაქის კონცეფციით გასათვალისწინებული პრიორიტეტები - სარეკრეაციო ზონები: ბაღები, სკვერები და საუბნო მწვანე კორიდორები. კონცეფციის ერთ-ერთ სავიზიტო ნაწილს გამწვანება წარმოადგენს, გამწვანებული ტერიტორიების, არსებული სარეკრეაციო და სამომავლოდ სარეკრეაციოდ განსავითარებელ სივრცეებზე.

მერიაში ასევე მიიჩნევენ, რომ რკინიგზის საკითხზე არ ჩატარებულა შესაბამისი კვლევა: "მუნიციპალიტეტი მიიჩნევს, რომ რკინიგზის სამგაზვრო ხაზის გაუქმების შეფასება ცალმხრივია და უგულებელყოფს გამჭოლი სამგზავრო რკინიგზის ხაზის და ცენტრალური სადგურის სატრანსპორტო მნიშვნელობას", - წერია დოკუმენტში.

თბილისის მერია განაშენიანების გენგეგმის შექმნელებს კულტურული მემკვიდრეობის დაცვის ზონებთან დაკაშირებითაც აკრიტიკებს.

25 დეკემბერს თბილისის მერიამ გენგეგმის ჯგუფი 145 600 ლარით დააჯარიმა და ხარვეზების გამოსასწორებლად 10-დღიანი ვადა მისცა. თბილისის მიწათსარგებლობის გენერალურ გეგმაზე მუშაობა 2015 წელს დაიწყო. კომპანია „სითი ინსტიტუტი საქართველო“ მერიის ყოფილმა ხელმძღვანელობამ კონკურსის წესით შეარჩია და ქალაქის მთავარი დოკუმენტის შესაქმნელად 2 800 000 ლარი გამოყო.

თბილისის განვითარების გენერალური გეგმის პროექტი, რომელიც 2030 წლამდეა გაწერილი, მერიას 18 ივნისს ჩაჰბარდა. მისი შემქმნელების თქმით, ეს დოკუმენტის სამუშაო ვერსიაა და მნიშვნელოვანია პროცესში მოქალაქეთა ჩართვა. თბილისის ახალარჩეული მერმა უკვე დასრულებული გენგეგმა თავიდან შესასწავლად სპეციალურ ჯგუფს გადასცა.