საზოგადოება და ბანკები: ინფლაციის ზრდა მოსალოდნელი არ არის

ეროვნული ბანკის დღევანდელი გადაწყვეტილების შედეგად საპროცენტო განაკვეთი არ შეეცვლება კომერციული ბანკების 38 244 მსესხებელს. ცვლად საპროცენტო განაკვეთზე მიბმული სესხები საზოგადოება და ბანკებმა მიმოიხილა. 2018 წლის 1 იანვრის მდგომარეობით, ცვლად საპროცენტო განაკვეთზე მიბმული 38 244 სესხია გაცემული. მათი აბსოლუტური უმრავლესობა რეფინანსირების განაკვეთზეა მიბმული. იმის გამო, რომ ეროვნული ბანკის დღევანდელი გადაწყვეტილებით რეფინანსირების განაკვეთი უცვლელად 7.25% დარჩა, ცვლად საპროცენტო განაკვეთზე მიბმულ სესხებზე მსესხებლებს საპროცენტო განაკვეთი არ შეეცვლებათ. დღეის მდგომარეობით, ცვლად საპროცენტო განაკვეთზე მიბმული 1838 მლნ ლარის მოცულობის სესხია გაცემული.

1 დეკემბრიდან 1 იანვრამდე გაცემული სესხების რაოდენობა 1510-ით გაიზარდა, ხოლო მთლიანი პორტფელი - 1750 მილიონიდან 1838 მილიონ ლარამდე. 38 244 ხელშეკრულებიდან 15 589 უძრავი ქონებით უზრუნველყოფილი სესხია, მოცულობა კი 656 მილიონი ლარი. რაოდენობრივად მეორე ადგილზეა სამომხმარებლო ტიპის სესხები. რეფინანსირების განაკვეთზე 1 იანვრის მონაცემებით 15 498 სესხია მიბმული. 

4818 ხელშეკრულებაა გაფორმებული ბიზნეს სესხების გასაცემად. მთლიანი პორტფელი 900 მილიონი ლარია. აქედან მცირე და საშუალო ბიზნესის დასაფინანსებლად ბანკებმა 250 მილიონი ლარი გასცეს. ყველაზე მცირე რაოდენობით გაცემულია რეფინანსირების განაკვეთზე მიბმული ავტოსესხი. სულ 1 იანვრის მონაცემებით 300 ხელშეკრულებაა გაფორმებული. 

ასევე გაცემულია 2039 ცვლად საპროცენტო განაკვეთზე მიბმული სესხი, რომელთა კონკრეტული მიზნობრიობა უცნობია. ამ სესხების მთლიანი მოცულობა 43 მილიონი ლარია.

ცვლად საპროცენტო განაკვეთზე მიბმული სესხები 1 იანვრის მდგომარეობით ლარში გაცემული მთლიანი საკრედიტო პორტფელის 20%-ია.

"ვფიქრობთ, რომ ლარის გაცვლითი კურსის გამყარების პირობებში ინფლაციის შემდგომი ზრდა არ არის მოსალოდნელი. ვინაიდან ცვლად საპროცენტო განაკვეთში გაცემული სესხების დიდი წილი ბიზნესესხებზე და იპოთეკურ მსესხებლებზე მოდის, საპროცენტო განაკვეთების შემცირება/შენარჩუნება მნიშვნელოვანია, როგორც ეკონომიკური ზრდის, ასევე ლარიზაციის მიმართულებით. ვიმედოვნებთ, მომდევნო პერიოდებში შემცირდება ლარში საპროცენტო განაკვეთები, რომელიც ბოლო ერთი წლის განმავლობაში უცვლელი რჩება", - აცხადებენ არასამთავრობო ორგანიზაციაში.