მარეგულირებელმა კომისიამ მაგთი და ჯეოსელი დემპინგური ფასების გამო წერილობით გააფრთხილა

კომუნიკაციების მარეგულირებელმა კომისიამ კომპანიების მაგთისა და ჯეოსელის მიერ დემპინგური ტარიფებით მომსახურება დაადგინა, რის გამოც წერილობითი გაფრთხილება მისცა. ეს გადაწყვეტილება კომისიამ რამდენიმე წუთის წინ მიიღო. 

კომუნიკაციების კომისიამ დაასრულა ბაზრის მოკვლევა და დაადგინა, რომ  შპს „მაგთიკომისა“  და შპს „ჯეოსელის“ მხრიდან კონსოლიდირებული ტენდერის მომსახურეობის ფარგლებში ორივე კომპანიას დაუფიქსირდა ზარალი. 

"კომისიის გადაწყვეტილებით, შპს ,,მაგთიკომს“ და შპს „ჯეოსელს“ მიეცა წერილობითი გაფრთხილება ,,ელექტრონული კომუნიკაციების შესახებ“ საქართველოს კანონის მე-19 მუხლის მეორე პუნქტის ბ) ქვეპუნქტის, 33-ე მუხლის პირველი პუნქტის დარღვევისთვის, კერძოდ დანახარჯებისა და შემოსავლების განცალკევებულად აღრიცხვის სპეციფიკური  ვალდებულების შეუსრულებლობის გამო. იმ შემთხვევაში, თუ კომპანიებს ერთი წლის განმავლობაში კვლავ დაუფიქსირდებათ დარღვევა ისინი ფინანსურ სანქციებს მიიღებენ, რაც კომპანიების ერთი წლის შემოსავლის 0,5 % შეადგენს. 
ტარიფის სუბსირიდების მოკვლევას, საკითხის შესწავლის ფარგლებში კომუნიკაციების კომისიამ შპს „მაგთიკომიდან“ და შპს „ჯეოსელიდან“ გამოითხოვა კონსოლიდირებული ტენდერით გაწეული ხარჯებისა და  მიღებული შემოსავლების შესახებ ინფორმაცია. კომპანიების მიერ წარმოდგენილი ინფორმაციის შესწავლის შედეგად დადგინდა, რომ მობილური კომპანიების მიერ კონსოლიდირებული ტენდერის ფარგლებში გაწეული ხარჯები ბევრად აღემატებოდა ამ მომსახურეობიდან მიღებულ შემოსავლებს", - წერია კომისიის განცხადებაში.

კომუნიკაციების კომისიის თავმჯდომარე კახა ბექაურმა 6 მარტს განაცხადა, რომ „მაგთიკომმა“ და „ჯეოსელმა“ „ელექტონული კომუნიკაციების შესახებ“ საქართველოს კანონი და კომისიის მიერ 2010 წლის 21 მაისის N 240/9 და 2011 წლის 25 იანვრის №26/9  გადაწყვეტილებები დაარღვიეს, რომლის მხიედვითაც „შპს „ჯეოსელს“ და შპს „მაგთიკომს“ დაკისრებული აქვთ ვალდებულება, რომ არ დაუშვან კონურენციის შემზღუდავი ქმედებები და სატარიფო შეღავათების სუბსიდირება სხვა მომხარებელთა ხარჯზე.