აშშ-ის ანტირუსულ სანქციებში VTB ბანკიც მოხვდა

აშშ-ის ანტირუსულ სანქციებში, რომელიც რამდენიმე დღის წინ გააფართოვა, რუსი ბიზნესმენი ანდრეი კოსტინიც მოხვდა. ის რუსული VTB Bank-ის აღმასრულებელი დირექტორია. დღეს კი აშშ-მა სანქციები კიდევ გააფართოვა და სიაში უკვე თავად VTB Bank-იც არის შეტანილი, რომელიც ქართულ ბაზარზეც ოპერირებს.

როგორც ბანკის აღმასრულებელმა დირექტორმა ანდრეი კოსტინმა CNN-თან ინტერვიუში განაცხადა, სანქციები ბიზნესზე დიდ გავლენას ვერ მოახდენს, რადგან ბანკი თავისი სამუშაოს თითქმის 90%-ს რუსეთში ახორციელებს.

ანდრეი კოსტინის განცხადებით, სანქციებში პირადულს ვერაფერს ხედავს, რადგან ეს პოლიტიკის ნაწილია, რომელიც კოსტინის აზრით, "სადღაც უნდა დასრულდეს და ურთიერთობების განახლებაზე უნდა დაიწყონ მხარეებმა მუშაობა".

კოსტინმა აშშ სანქციებთან დაკავშირებით გაუგებრობაში დაადანაშაულა და განმარტა, რომ მას ცუდი არაფერი გაუკეთებია, არამედ ყოველთვის ცდილობდა კარგი ურთიერთობები ჰქონოდა ამერიკელ პარტნიორებთან და ინვესტორებთან.

რაც შეეხება ანტირუსული სანქციების გავლენას „ვი-თი-ბი“-ს საქართველოს ოფისზე, imedinews-ს ბანკის საზოგადოებასთან ურთიერთობის სამსახურში განუცხადეს, რომ ანტირუსული სანქციები რუსეთის სახელმწიფოს მიერ გამოშვებულ ფასიან ქაღალდებზე ვრცელდება, ბანკის ქართულ წარმომადგენლობასთან კავშირი არ აქვს და შესაბამისად მის მუშაობაზეც ვერ აისახება. ამასთან, "ვი-თი-ბი საქართველოში" დასძენენ, რომ ასეთი სანქციები აშშ-მა გასულ წელსაც შეიმუშავა, ახალი სანქციები კი ჯერ მხოლოდ პროექტის სახით არსებობს აშშ-ის კონგრესში და მიღებული არ არის.

2005 წელს “ვნეშტორგბანკმა” შეიძინა სს“გაერთიანებული ქართული ბანკის” აქციათა საკონტროლო პაკეტი - 50%+1აქცია. 2006 წელს კი “გაერთიანებულ ქართულ ბანკს” სახელი შეეცვალა და ეწოდა სს”ვითიბი ბანკი ჯორჯია”.

სს ”ვითიბი ბანკ ჯორჯიას” უმსხვილესი აქციონერები: რსს “ბანკი ვეტებე” (აქციათა 53.17%) და ევროპის რეკონსტრუქციისა და განვითარების ბანკი (EBRD) – 18.87%.