ევროკავშირის კანონმდებლობის შესაბამისად, მომხმარებლები გაზის მიმწოდებლის არჩევას შეძლებენ

თბილისში ვროკავშირის კანომდებლობის მიხედვით ბუნებრივი გაზის რეფორმირების თაობაზე პოლიტიკური დისკუსია გაიმართა.

ღონისძიებაზე ენერგეტიკული გაერთიანების სამდივნოს ექსპერტებმა ცოდნა და გამოცდილება გაუზიარეს საქართველოს ბუნებრივი გაზის სექტორის სტრუქტურების წარმომადგენლებს.

საქართველომ, ენერგეტიკული გაერთიანების პროტოკოლით განსაზღვრული პირობების შესაბამისად, აიღო ვალდებულება, რომ შემდგომი ორი წლის განმავლობაში, ბუნებრივი გაზის სექტორში ევროკავშირის კანონმდებლობას დაუახლოვდეს.

ევროკავშირის „მესამე ენერგეტიკული პაკეტის“ დანერგვა მოიაზრებს ბუნებრივი გაზის სექტორის რესტრუქტურიზაციას და კონკურენციისთვის გახსნას, ასევე მომხმარებლებისთვის მნიშვნელოვანი სარგებლის უზრუნველყოფას.

„გაზის მომხმარებლებს არ უნდა ეშინოდეთ, რომ ბუნებრივი გაზის ბაზრის რეფორმები მათ სიცივეში დატოვებს, არამედ პირიქით, ენერგეტიკული პაკეტი უზრუნველყოფს კონკრეტული ნორმების შემუშავებას სოციალურად დაუცველი მოსახლეობის დასაცავად, ასევე ბუნებრივი გაზის მიწოდების გასაუმჯობესებლად და იძლევა მიმწოდებლის გამოცვლის მარტივი წესის დანერგვის გზით, გაზის მიმწოდებლის არჩევის საშუალებას. ეჭვგარეშეა, რომ წინ მრავალი გამოწვევა იქნება, მაგრამ დღეისათვის საქართველოს ენერგოსექტორის მონაწილეთა მხრიდან გამოხატული ძალზედ დადებითი თანამშრომლობის გათვალისწინებით, დარწმუნებული ვარ, რომ ერთად ჩვენ შევძლებთ შევიმუშაოთ სტაბილური, გამჭვირვალე სამართლებრივი გარემო, რომელიც ხელს შეუწყობს ინვესტიციებს და მთავარ ამოსავალ წერტილად დაისახავს ენერგომომხმარებლებს“, - თქვა ენერგეტიკული გაერთიანების დირექტორმა იანეს კოპაჩმა.

„საქართველო მზადაა დანერგოს ევროკავშირის ენერგეტიკის სექტორის პრინციპები და მარეგულირებელი ნორმები. ყველა ჩვენგანისთვის ნათელია, რომ უფრო ეფექტური და გამჭვირვალე ბუნებრივი გაზის ბაზრის ჩამოყალიბებისკენ მიმავალი გზა არ არის მარტივი. განვითარების სხვა პარტნიორებთან ერთობლივად, ევროკავშირი კვლავაც მზადაა მხარდაჭერა გაუწიოს მთავრობას და არსებული გამოწვევა გარდაქმნას, როგორც შესანიშნავი შესაძლებლობა ეკონომიკური განვითარებისთვის და თითოეული მოსახლისთვის უკეთესი მომსახურების უზრუნველსაყოფად“, - განაცხადა ევროკავშირის ელჩმა საქართველოში იანოშ ჰერმანმა.

"აღნიშნული პროცესი წარმოადგენს ჩვენი ბუნებრივი გაზის სექტორის მოდერნიზების და ენერგეტიკული უსაფრთხოების გაძლიერების საშუალებას და უფრო დაგვაახლოებს ჩვენს ევროპელ პარტნიორებთან“, - განაცხადა ირინა მილორავამ. 

ღონისძიება ენერგეტიკული გაერთიანების სამდივნოს მიერ განხორციელებული EU4Energy Governance Project (ევროკავშირი ენერგეტიკისთვის მმართველობა) პროექტის ფარგლებში გაიმართა.