კაპანაძე ხორავას ქუჩაზე კიდევ ერთი მოზარდის დაჭრის ფაქტზე გამოძიების დაწყებას ითხოვს

პარლამენტის დროებითი საგამოძიებო კომისიის ხელმძღვანელი სერგი კაპანაძე შსს-ს მიმართავს, დაუყოვნებლივ დაიწყოს გამოძიება ხორავას ქუჩაზე კიდევ ერთი მოზარდის, გ.მ-ს ცივი იარაღით დაჭრის ფაქტზე და გაატაროს შესაბამისი ოპერატიული, სამძებრო და საგამოძიებო ღონისძიებები დანაშაულის ჩამდენი პირის იდენტიფიცირებისთვის. ამის შესახებ 1tv წერს.

როგორც სერგი კაპანაძემ განაცხადა, პირველ დეკემბერს, გარდა ორი მოკლული მოზარდისა, დაშავდა მოზარდი გ.მ. ეს ინფორმაცია შსს-ს და პროკურატურას ჰქონდა, თუმცა, როგორც კაპანაძემ აღნიშნა, ამ დრომდე გამოძიება არ დაწყებულა.

„ მიუხედავად იმისა, რომ ეს ინფორმაცია ცნობილი იყო, ცალკე გამოძიება დაწყებული არ არის, საგამოძიებო მოქმედებები ამ მიმართულებით, ჩემი ღრმა რწმენით ჩატარებული არ არის ისევე, როგორც ცალკე არ არის გამოყოფილი საქმე ამ კონკრეტულ თემაზე. ჩვენ საქმის მასალებიდან ვხედავთ, რომ არის სხვა გამოყოფილი საქმეები, მაგრამ ეხება კონკრეტულ სხვა დანაშაულებს. კერძოდ, ეხება დაფარვას, არშეტყობინებას, მაგრამ არა ჯანმრთელობის დაზიანებას, რაც ნამდვილად იკვეთება გ.მ-ს შემთხვევაში. ამიტომ, რეკომენდაციის არსი არის, რომ ამ კონკრეტულ თემაზე შსს-მ დაუყოვნებლივ დაიწყოს გამოძიება გ.მ-ს ცივი იარაღით დაჭრის ფაქტზე და გაატაროს შესაბამისი ოპერატიული, სამძებრო და საგამოძიებო ღონისძიებები დანაშაულის ჩამდენი პირის იდენტიფიცირებისთვის“, – განაცხადა სერგი კაპანაძემ.

პარლამენტის დროებითი საგამოძიებო კომისია დღეს სერგი კაპანაძის მიერ ინიცირებულ რეკომენდაციებს განიხილავს. დღის წესრიგის მიხედვით, კომისიის წევრები თავდაპირველად შინაარსობრივად განიხილავენ იმ რეკომენდაციებს, რომელიც კომისიის თავმჯდომარემ, „ევროპული საქართველოს“ წევრმა, სერგი კაპანაძემ დააყენა.

საგამოძიებო კომისია დღესვე ზვიად კუპრავასაც დაკითხავს.

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.

პარლამენტის დროებითი საგამოძიებო კომისიის მანდატის და უფლებამოსილების შესახებ ინფორმაციას შეგიძლიათ გაეცნოთ ამ ბმულზე.