ცნობილია, როდის დასრულდება თბილისში მიმდინარე ზოგიერთი ინფრასტრუქტურული პროექტი

თბილისის მერიის ინფორმაციით, დედაქალაქში მიმდინარე ინფრასტრუქტურული სამუშაოების ნაწილი სექტემბერ-ოქტომბერში, ნაწილი კი ნოემბერ-დეკემბერში დასრულდება. სამუშაოებში  27 მილიონ ლარზე მეტი დაიხარჯება. ამის შესახებ ინფორმაციას სააგენტო "ინტერპრესნიუსი" ავრცელებს.

20 ოქტომბერს დასრულდება კარტოზია-ცინცაძის ქუჩების გადაკვეთაზე სატრანსპორტო კვანძის მოწყობა, რომლის ღირებულება 968 952,40 ლარია.

რაც შეეხება მარშალ გელოვანის და სარაჯიშვილის ქუჩების გადაკვეთაზე ორდონიანი კვანძის მოწყობას, სამუშაოები აქ 2018 წლის 16 დეკემბერს უნდა დასრულდეს. პროექტის ღირებულება 4 284 998,98 ლარია.

2018 წლის 22 სექტემბერს უნდა დასრულდეს ფონიჭალის დამაკავშირებელი მიწისქვეშა გზაგამტარის მშენებლობა, რომლის პროექტის ღირებულება 2 350 000 ლარია. 

2 დეკემბერს უნდა დასრულდეს კახეთის გზატკეცილისა და ჯავახეთის ქუჩის გადაკვეთაზე საავტომობილო ხიდი-გზაგამტარის აღდგენა-რეკონსტრუქცია, რომელიც მერიის ბიუჯეტიდან 1 581 600 ლარით ფინანსდება. 

2019 წლის 23 მარტისთვის ვარაუდობენ სარაჯიშვილის გამზირზე, მდინარე გლდანულაზე არსებული ხიდების სარეკონსტრუქციო სამუშაოების დასრულებას, რომელიც 2018 წლის 29 მარტს დაიწყო. პროექტის ღირებულება 8 057 871,5 ლარია.

24 ივლისს დაიწყო და 22 ოქტომბერს დასრულდება ბარათაშვილის აღმართის რეაბილიტაცია, რომლის პროექტის ღირებულება 3 233 233 ლარია. ასევე, 13 ნოემბერს დასრულდება კახეთის გზატკეცილიდან სოფელ ნასაგურამდე მისასვლელი გზის რეაბილიტაცია, რომელიც 2 878 452 ლარი დაჯდება. 

14 ნოემბრამდე გაგრძელდება უზნაძის ქუჩის რეაბილიტაცია, რომლის პროექტის ღირებულება 1 987 280,99 ლარია; შარტავა-კოსტავას ქუჩის რეაბილიტაციისთვის კი, 10 000 000 ლარია გამოყოფილი, რომლის სამუშაოები 14 აგვისტოს დაიწყო და 20 სექტემბერს უნდა დასრულდეს.

22 ნოემბრისთვის იგეგმება ჩიქოვანის ქუჩის რეაბილიტაციის დასრულება, რომლის პროექტის ღირებულება 2 077 777 ლარია.