Toyota მანქანებს ელექტროგაყვანილობის პრობლემაზე საქართველოშიც შეამოწმებს

ძრავში ელექტროგაყვანილობის პრობლემის გამო, Toyota 1.03 მილიონ ჰიბრიდულ ავტომობილს იაპონიიდან, ჩრდილოეთ ამერიკიდან, ევროპიდან და სხვა რეგიონებიდან გაიწვევს. როგორც bpn.ge წერს, Toyota მანქანებს საქართველოშიც შეამოწმებს. ამის შესახებ გამოცემას საქართველოში "Toyota"-ს ოფიციალურ წარმომადგენლობაში უთხრეს.

კომპანიის ქართულ წარმომადგენლობაში ამბობენ, რომ შესამოწმებელი მანქანების სიაში მთელი კავკასიის რეგიონის მასშტაბით, Toyota-ს ოფიციალური დილერების მიერ გაყიდული 97 ავტომობილი მოხვდა.

"ცოტა ხნის წინ კომპანია Toyota-მ მსოფლიოს მასშტაბით მართლაც გაავრცელა ინფორმაცია გარკვეული ავტომობილების „სერვისის სპეციალური კამპანიის“, ე.წ. „რიქოლის“ შესახებ. აღნიშნულ შემთხვევაში „რიქოლი“ შეეხო 2015-2018 წლებში წარმოებული პრიუსის და С-HR-ის ჰიბრიდულ მოდელებს. ამის მიზეზად ძრავის განყოფილებაში არსებულ ელექტროსადენებსა და ელექტროშეერთების ხუფს შორის ხახუნის შედეგად სადენების იზოლაციის შესაძლო დაზიანება დასახელდა. ამასთანავე უნდა აღინიშნოს, რომ საუბარი არ არის მაღალი ძაბვის სადენებზე.

ამასთან, გვსურს დამატებით განვმარტოთ, რომ „რიქოლის“ გამოცხადება უმრავლეს შემთხვევაში არ გულისხმობს მიმდინარე პრობლემის არსებობას, არამედ მიზნად ისახავს შესაძლო გაუმართაობის თავიდან აცილებას. მაგალითისთვის, ზემოთ მოყვანილ „რიქოლში“ მოხვედრილი, ანუ შესამოწმებლად განკუთვნილი, ავტომობილებიდან აღნიშნული პრობლემის არსებობის სავარაუდო მოსალოდნელი პროცენტი მხოლოდ 0.085%-ს შეადგენს. თუმცა „ტოიოტას“ გლობალური ფილოსოფიიდან გამომდინარე, ამ მინიმალური პროცენტის დასაზღვევად „შესაძლო“ გაუმართაობის თეორიული ალბათობის მქონე ყველა ავტომობილის „რიქოლი“ გამოცხადდა“, - განმარტავენ „ტოიოტა კავკასიაში“.

კომპანიის საქართველოს წარმომადგენლობაში ამბობენ, რომ მათი ოფიციალური დილერები უშუალო დაკავშირებას მხოლოდ იმ ავტომობილების მფლობელებთან შეძლებენ, ვინც მანქანა ოფიციალურ დილერთან შეიძინა. თუმცა, კომპანია „ტოიოტას“ გადაწყვეტილებით, დღეისათვის იმ მომხმარებელსაც, რომლის ავტომობილი შეძენილია მეორად ბაზარზე ან ნებისმიერ სხვა ქვეყანაში, ასევე შეუძლია თავისი ავტომობილის უნიკალური VIN კოდის გამოყენებით გაარკვიოს, არის თუ არა მისი მანქანა „რიქოლის“ სიაში. ამისთვის ისინი ტოიოტას ოფიციალურ ვებ გვერდს („სპეციალური სერვისის კამპანიის“ განყოფილებას უნდა ეწვივნონ.