საქართველოს საგარეო ვალი გაიზარდა

2016 წლის ბოლოს, საქართველოს უცხოელი კრედიტორების მიმართ 15,5 მლრდ დოლარი ემართა. ეს 41 მლრდ ლარი და ქვეყნის მთლიანი შიდა პროდუქტის 108.2%-ია. ამის შესახებ ინფორმაციას ეროვნული ბანკი ავრცელებს.

გასული წლის ბოლო კვარტალში, საქართველოს მთლიანი საგარეო ვალი 149 მლნ აშშ დოლარით გაიზარდა, აქედან ვალი ოპერაციული და სხვა ცვლილებების გამო 496.2 მლნ აშშ დოლარით და 37.2 მლნ აშშ დოლარით გაიზარდა, ხოლო ფასისა და საკურსო ცვლილებების გამო, შესაბამისად, 45.7 და 338.7 მლნ. აშშ დოლარით შემცირდა.

სახელმწიფო საგარეო ვალმა შეადგინა 6.6 მლრდ აშშ დოლარი (17.5 მლრდ ლარი), რაც მშპ-ს 46.1 პროცენტია, რომლიდანაც სამთავრობო სექტორის ვალია 4.7 მლრდ აშშ დოლარი (12.4 მლრდ ლარი; მშპ-ს 32.6 პროცენტი), ეროვნული ბანკის ვალდებულებები - 200.3 მლნ აშშ დოლარია (530.1 მლნ ლარი; მშპ-ს 1.4 პროცენტი), აქედან, 193.6 მლნ აშშ დოლარი განაწილებული ნასესხობის სპეციალური უფლებაა, რომელსაც არ აქვს დაფარვის ვადა და პრაქტიკულად, მისი გადახდის ვალდებულება არ დადგება, სანამ საქართველო იქნება საერთაშორისო სავალუტო ფონდის წევრი.

სახელმწიფო საწარმოების ობლიგაციები და სესხები შესაბამისად - 871.8 მლნ აშშ დოლარი (2.3 მლრდ ლარი; მშპ-ს 6.1 პროცენტი) და 855.9 მლნ აშშ დოლარი (2.3 მლრდ ლარი; მშპ-ს 6.0 პროცენტი).

საბანკო სექტორის საგარეო ვალმა შეადგინა 3.1 მლრდ აშშ დოლარი (8.3 მლრდ ლარი; მშპ-ს 21.9 პროცენტი), სხვა სექტორების საგარეო ვალმა - 5.1 მლრდ აშშ დოლარი (13.5 მლრდ ლარი; მშპ-ს 35.7 პროცენტი) და კომპანიათაშორისო ვალმა - 2.4 მლრდ აშშ დოლარი (6.3 მლრდ ლარი; მშპ-ს 16.5 პროცენტი).

მთლიანი საგარეო ვალის 93.7 პროცენტი დენომინირებულია უცხოური ვალუტით.

საქართველოს წმინდა საგარეო ვალმა, 2016 წლის 31 დეკემბრის მდგომარეობით, 9.5 მლრდ აშშ დოლარი (25.1 მლრდ ლარი) შეადგინა, რაც 2016 წლის წლიური მშპ-ს 66.1 პროცენტია. აქედან, სახელმწიფო სექტორის წმინდა საგარეო ვალი 3.8 მლრდ აშშ დოლარია (10.1 მლრდ ლარი), რაც მშპ-ს 26.6 პროცენტია.