PMCG: დასაქმებულების 46%-ის შემოსავალი 400 ლარზე ნაკლებია

შრომის ბაზარზე 2017 წელს ფიზიკური პირების 46%-ის შემოსავალმა 400 ლარზე ნაკლები შეადგინა - ამ მონაცემებს საკუთარ ვებგვერდზე საკონსულტაციო კომპანია PMCG აქევყნებს. 

საკონსულტაციო კომპანია PMCG -ის კვლევამ აჩვენა, რომ თვეში მხოლოდ დასაქმებულების 1%-ს ჰქონდა 8 333 ლარზე მეტი შემოსავალი.  სტატისტიკის თანახმად ამ რაოდენობის შემოსავალი მხოლოდ 9 826 ადამიანმა მიიღო.  

საქართველოს შემოსავლების სამსახურის ელექტრონულ საინფორმაციო სისტემაზე დაყრდნობით, 2017 წელს, სულ 1 222 153 ფიზიკური პირის შემოსავალი დეკლარირდა.

2017 წელს, თვეში საშუალოდ 1000 ლარზე ნაკლები შემოსავალი ფიზიკურ პირთა 74%-ს (914 227 ადამიანი), 1000 ლარზე მეტი კი 26%-ს (307 926 ადამიანი) დაუფიქსირდა.

2017 წელს, საშუალო ნომინალური ხელფასის ზრდის მიუხედავად, მკვეთრი სხვაობაა ხელფასებს შორის ეკონომიკურ საქმიანობათა სახეების მიხედვით.

2017 წელს, სამი ყველაზე მაღალანაზღაურებადი სექტორი იყო: საფინანსო და სადაზღვევო საქმიანობები (2008 ლარი), პროფესიული, სამეცნიერო და ტექნიკური საქმიანობები (1595) და მშენებლობა (1466 ლარი). ყველაზე დაბალი ანაზღაურება კი შემდეგ სექტორებში დაფიქსირდა: განთავსებისა და საკვების მიწოდების საქმიანობები (672 ლარი), სოფლის მეურნეობა (643 ლარი) და განათლება (577 ლარი).

აღსანიშნავია, რომ ყველაზე მაღალანაზღაურებად სექტორში, დასაქმებული მოსახლეობის 2% მუშაობდა, მაშინ როცა ორ ყველაზე დაბალანაზღაურებად სექტორში დასაქმებულთა 52% იყო კონცენტრირებული.