შემოსავლების სამსახური: კონტრაბანდული სიგარეტის მოცულობა არ გაზრდილა

ქვეყანაში კონტრაბანდული სიგარეტი არსებობს, თუმცა კონტრაბანდის მასშტაბი არ არის გაზრდილი- ამის შესახებ შემოსავლების სამსახურის უფროსმა, ვახტანგ ლაშქარაძემ ტელეკომპანია „მაესტროს“ პირდაპირ ეთერში საუბრისას განაცხადა. 

როგორც მან აღნიშნა, სიგარეტზე აქციზის გადასახადის მატება იწვევს კონტრაბანდული გზით შემოტანილი სიგარეტის გაზრდის რისკს, თუმცა ეს საფრთხე გაანალიზებული აქვს ფინანსთა სამინისტროს შემოსავლების სამსახურს და წინასწარ განსაზღვრულია ის რესურსიც, რითიც ხორციელდება კონტრაბანდის წინააღმდეგ ბრძოლა. 

„პირდაპირ შემიძლია ვთქვა, რომ დღეს, საქართველოში კონტრაბანდა არ არის გაზრდილი, ანუ არ არის იმაზე მეტი, ვიდრე იყო შარშან ან შარშანწინ. შეგვიძლია ვთქვათ, რომ კონტრაბანდის წილი ქვეყანაში არ სცდება 1-1.5%-ს. მინდა დაგარწმუნოთ, რომ ზუსტად ვიცით ყველა ის წერტილი, მათ შორის, ბაზრებში, მაღაზიებსა და მათ მიმდებარე ტერიტორიებზე, სადაც იყიდება კონტრაბანდული სიგარეტები, მაგრამ კონტროლის ღონისძიებები, რომლებსაც ვატარებთ, ასევე, ამოღებული სიგარეტის რაოდენობა, ცხადყოფს, რომ ადგილი არ აქვს კონტრაბანდის ორგანიზებულად შემოტანილ ფაქტებს. საქართველოს მასშტაბით, სიგარეტის მოხმარება დღეში 1 მილიონი კოლოფია. რამდენიმე ძალოვან უწყებასთან ერთად განხორციელებული კონტროლის ღონისძიებების შედეგად ამოღებული კოლოფების რაოდენობა დღის განმავლობაში არ აჭარბებს 1000 კოლოფს - ანუ დარწმუნებით შეგვიძლია ვთქვათ, რომ რაოდენობრივად, საგანგაშო სურათი ნამდვილად არ გვაქვს, თუმცა ეს არ ნიშნავს, რომ ამით ჩვენ ღონისძიებებს ან ვწყვეტთ ან არ ვაგრძელებთ. პირიქით, კონტროლის ღონისძიებები ინტენსიურად ხორციელდება“, - აღნიშნა შემოსავლების სამსახურის უფროსმა. მისი თქმით, განსაკუთრებული ყურადღება ექცევა ოკუპირებული ტერიტორიებიდან კონტრაბანდული სიგარეტის შემოტანის ფაქტებს და ამ მიმართულებით მუშაობა მომავალშიც გაგრძელდება.

მისივე თქმით, საბაჟო ორგანოები მაქსიმალურად არიან ჩართულები სიგარეტის კონტრაბანდის აღკვეთის ღონისძიებებში.  ლაშქარაძის განმარტებით, კონტრაბანდის წინააღმდეგ აქტიური ღონისძიებები ხორციელდება ქვეყნის კონტროლირებად საზღვრებზე-საბაჟო-გამშვებ პუნქტებზე, რისთვისაც გამოყენებულია კინოლოგიის სამსახურიც. 

„ამავე დროს, გასათვალისწინებელია, რომ ჩვენი ერთ-ერთი მთავარი მოვალეობაა, რაც შეიძლება სწრაფად და შეუფერხებლად შემოვუშვათ ტურისტი ქვეყანაში, განსაკუთრებით იმ პერიოდში, როდესაც დიდი ტურისტული მიმოსვლაა საზღვრებზე. რა თქმა უნდა, ეს შედარებით ართულებს კონტრაბანდული სიგარეტის ძებნას, თუმცა ფინანსთა სამინისტროს შემოსავლების სამსახურის მებაჟე ოფიცრები ყოველდღიურ რეჟიმში მუშაობენ ქვეყნის საზღვარზე არადეკლარირებული სიგარეტის კანონდარღვევით შემოტანის მცდელობის ფაქტების აღსაკვეთად“, - განაცხადა ვახტანგ ლაშქარაძემ.