ბიძინა კულუმბეგოვი: გრიპი უფრო მეტად მკვლელი ვირუსია, ვიდრე - კორონავირუსი

მეტი სიცხადისთვის ციფრებით ვიტვი, თითქოს, გრიპის რამდენიმე ანტივირუსული პრეპარატი გვაქვს, არსებობს ვაქცინაც, მაგრამ მარტო წელს, 2019-2020 წლის სეზონში, დღევანდელ დღემდე, ამერიკის შეერთებულ შტატებში გრიპით თითქმის, 13 ათასია გარდაცვლილი. ამიტომ დღეის მონაცემებით, გრიპი უფრო მეტი მკვლელი ვირუსია, ვიდრე არსებული კორორნავირუსი, - ამის შესახებ იმუნოლოგმა, ბიძინა კულუმბეგოვმა, ტელეკომპანია „პირველის“ ეთერში განაცხადა.

ექიმის თქმით, ჯერჯერობით საპანიკო არაფერია და თავად ოპტიმისტურად არის განწყობილი, რადგან ახალმა კორონავირუსმა ჯერჯერობით 81 ათასი ადამიანი დააავადა.

„საგანგებო მდგომარეობა ჯანდაცვის მსოფლიო ორგანიზაციამ იმიტომ გამოაცხადა, რომ ეს ვირუსი არის ახალი და ჩვენ არ ვიცით მისი საბოლოო თვისებები, ისიც კი არ ვიცით ზედაპირზე რამდენი ხანი ძლებს. შეშფოთება ამ ვირუსთან მიმართებაში არსებობს სწორედ იქიდან გამომდინარე, რომ ჩვენ ბოლომდე არ ვიცით, როგორ იქნება მისი საბოლოო სახე, როგორ მოიქცევა და რას გააკეთებს ის, თუმცა კიდევ ვიმეორებ, ჩვენთან ამ ეტაპზე პანიკის საფუძველი არ არსებობს“, - აცხადებს ბიძინა კულუმბეგოვი.

საქართველოში კორონავირუსის პირველი შემთხვევა 26 თებერვალს დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება.

უფრო ადრე ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.