გორის ჰოსპიტალში 5 საეჭვო შემთხვევიდან კორონავირუსი არც ერთს არ დაუდასტურდა

გორის სამხედრო ჰოსპიტალის საკარანტინო სივრცეში დღეისთვის 22 პაციენტია. მათგან ოთხი სამხედრო მოსამსახურე და 18 სამოქალაქო პირია. ასევე, პაციენტთა შორის ორი ბულგარეთის მოქალაქეა და ერთიც - ირანის. ყველა მათგანის მდგომარეობა დამაკმაყოფილებელია.

„არც ერთ პაციენტზე არ დაგვჭირდა დამატებითი ჩარევა. ახალი შემთხვევები იყო საეჭვო, რის გამოც 5 ნიმუში ლუგარის ლაბორატორიაში გავგზავნეთ. კორონავირუსი არც ერთს არ დაუდასტურდა. წინა დღეებში საკარანტინო სივრცე ოთხმა ადამიანმა დატოვა, მათ ორკვირიანი საინკუბაციო პერიოდი ამოეწურათ“, - განაცხადა გორის სამხედრო ჰოსპიტალის დირექტორმა, დავით ბარლიანმა.

საქართველოში კორონავირუსით ინფიცირების 15 შემთხვევაა დადასტურებული, კარანტინის რეჟიმშია 141 ადამიანი, ხოლო სტაციონარში მეთვალყურეობის ქვეშ – 51. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3491 ადამიანი ემსხვერპლა, 57389 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.