ენტონი ფაუჩი: CNN-სთვის მიცემულ ინტერვიუში არ მიგულისხმია, რომ პრეზიდენტი დამნაშავეა

აშშ-ის ალერგიისა და ინფექციური დაავადებების ეროვნული ინსტიტუტის დირექტორის, ენტონი ფაუჩის განცხადებით, ტელეკომპანია CNN-სთვის მიცემულ ინტერვიუში მას არ უგულისხმია, რომ პრეზიდენტი ტრამპი დამნაშავეა იმაში, რომ კორონავირუსთან ბრძოლაში დროულად არ ჩაერია.

„გუშინ ინტერვიუ მქონდა, სადაც ჰიპოთეტური კითხვა დამისვეს. ნებისმიერ ჰიპოთეტურ კითხვას შეუძლია რთულ მდგომარეობაში ჩაგაყენოთ, ვინაიდან პასუხია ის, თუ რა მოხდებოდა ან რა შეიძლება მომხდარიყო. ამ ჰიპოთეტური კითხვის ბუნება შემდეგი იყო: ადრე რომ მიგვეღო ზომები, გადაარჩენდა თუ არა ეს ადამიანებს? პასუხი ამ კითხვაზე დადებითია. რა თქმა უნდა, ზომების მიღება დამხმარე ფაქტორია. აქ ბევრჯერ მითქვამს, რომ ეს მუშაობს“, - განაცხადა ენტონი ფაუჩიმ.

მისივე თქმით, ინტერვიუში არასწორად შეარჩია ფორმულირება, როდესაც განაცხადა, რომ „ყველაფრის დახურვის გადაწყვეტილებას ბევრი წინააღმდეგობა მოჰყვა“. „პრეზიდენტმა ყური უგდო რეკომენდაციებს და შეზღუდვები დააწესა“, - განაცხადა ენტონი ფაუჩიმ.

CNN-ის ეთერში წამყვანის კითხვას, იქნებოდა თუ არა თავიდან აცილებული გარდაცვლილთა დიდი რაოდენობა იმ შემთხვევაში, თუ სოციალური დისტანცირებისა და თვითიზოლაციის რეჟიმი მარტის ნაცვლად თებერვალში დაწესდებოდა, ენტონი ფაუჩიმ უპასუხა:

„ლოგიკურია იმის თქმა, შეზღუდვები ადრე რომ ყოფილიყო დაწესებული, ეს მსხვერპლს შეამცირებდა. არავინ უარყოფს ამას. თავიდანვე ყველაფერი რომ დაგვეხურა, სიტუაცია ცოტათი განსხვავებული იქნებოდა. თუმცა, ყველაფრის დახურვის გადაწყვეტილებას ბევრი წინააღმდეგობა მოჰყვა. ჩვენ რეკომენდაციებს ვიძლევით, რომელსაც ხელისუფლება ზოგჯერ ითვალისწინებს, ზოგჯერ კი - არა“.