ივანე მაჭავარიანი: ის, რომ ჩვენი პოტენციალი ამოწურული არ არის, არ ნიშნავს, რომ ვალები უპასუხისმგებლოდ უნდა ავიღოთ

ის, რომ ჩვენი პოტენციალი ამოწურული არ არის, არ ნიშნავს, რომ ასე უპასუხისმგებლოდ, „უპრაგონოდ“ ვალები უნდა ავიღოთ, - ამის შესახებ „იმედის“ გადაცემაში „არენა“ ივანე მაჭავარიანმა განაცხადა. ფინანსთა მინისტრის თქმით, საერთაშორისო დახმარების მობილიზებისას ქვეყანამ კრიზისიდან გამოსვლისთვის საჭირო თანხაზე მეტი ვალი არ უნდა აიღოს და შესაბამისი პერიოდიდან ვალის შემცირებაზე უნდა დაიწყოს ფიქრი.

„საბოლოო ჯამში ჩვენ უნდა ავიღოთ იმდენი ვალი და იმდენი დაფინანსება, რამდენიც აუცილებელია, რომ ერთი - კრიზისი დავძლიოთ, მეორე - პოსტკრიზისული პერიოდი დავასტიმულიროთ. შემდგომი პერიოდი, რა საკვირველია, ჩვენ დავაგდებთ ვალის აღების ტემპს და ნელ-ნელა დავიწყებთ ვალის შემცირებას, რაც გააჯანსაღებს ჩვენ ფინანსურ მდგომარეობას, რაც გახდის ჩვენს ეკონომიკას გაცილებით მიმზიდველს“, - განაცხადა მინისტრმა.

მისი თქმით, ეს ეკონომიკის პოზიტიური განვითარების პერიოდში უნდა მოხდეს, რათა შემდგომი ფინანსური კრიზისის დროს სახელმწიფოს თანხების მოზიდვის რესურსი კვლავ ჰქონდეს.

„აქედან გამომდინარე, ეს მართლად უპრეცედენტო პერიოდია, მართლაც უპრეცედენტოდ გაგვეზრდება ვალის რაოდენობა, მაგრამ პასუხისმგებლიანი ეკონომიკური პოლიტიკით, რომელსაც აქამდე ვახორციელებდით და რომელმაც მოგვცა საშუალება, რომ ამდენი ვალი შეგვიძლია ერთად ავიღოთ, ისევე დავუბრუნდებით ამ პასუხისმგებლიან მაკროეკონომიკურ პოლიტიკას, რომლის ერთ-ერთი მახასიათებელი ნიშანი იქნება ვალის თანდათანობით შემცირება. ამიტომ როდესაც საუბრობენ, რომ დაფინანსება მოვიზიდეთ, იყო ადრე 4 მილიარდი, 2 მილიარდი, მინიმალურია ზოგადად გრანტების წილი,ეს ყველაფერი საბოლოო ჯამში ისახება ვალში“, - აღნიშნა მინისტრმა.