შოთა ცანავა: ჩვენ გადავლახეთ ვირუსის გავრცელების პირველი ფაზა, მაგრამ ეს არ გვაძლევს მოშვების უფლებას

ყველას გახსოვთ ფრაზა, „ომი დამთავრდა, მშვიდობის გეშინოდეთ“. სიმართლე გითხრათ, ეს მშვიდობა ცოტა მაშინებს. ახლა, შეზღუდვების შემსუბუქების პირობებში ყველაფერი დამოკიდებულია ჩვენს მოქალაქეებზე. შეზღუდვების მოხსნა მისასალმებელია, მაგრამ შევძლებთ ჩვენ მათი მოხსნისას რეკომენდაციების ისევ დაცვას? ეს გადაწყვეტილება ბევრი შრომისა და ფიქრის შემდეგაა მიღებული და ჩვენც მხარი უნდა ავუბათ მოცემულობას. მოსახლეობას ვურჩევ, არ უგულებელყონ ჩვენი რეკომენდაციები, განუხრელად მივყვეთ წესებს და არ ჩავთვალოთ, რომ უკვე გადავედით მეორე ნაპირზე. ჩვენ ნამდვილად გადავლახეთ შეკავების ფაზა, პირველი ეტაპი, ეს ერთად გავიარეთ და როგორც ჩანს, თურმე, შეგვძლებია წარმატებების მიღწევა. მაგრამ ეს არ გვაძლევს მოშვების უფლებას, - ამის შესახებ ლუგარის ლაბორატორიის ბიოუსაფრთხოებისა და განსაკუთრებით საშიში პათოგენების დეპარტამენტის უფროსმა, შოთა ცანავამ „დღის ქრონიკასთან“ საუბრისას განაცხადა.

შოთა ცანავას განცხადებით, საქართველოში ტურისტული სეზონის გახსნას ეპიდაფეთქება არ მოჰყვება.

„ტურიზმის გახსნა ძალზე მნიშვნელოვანი გადაწყვეტილებაა ეკონომიკისთვის. ვიტყოდი, ეს მტკივნეული, სარისკო გადაწყვეტილებაა, მაგრამ - აუცილებელი. ჩვენ ასევე პასუხისმგებლობით უნდა შევხვდეთ ამ ცვლილებასაც. ორგანიზება უნდა მოხდეს ისე, რომ ნაკლებად დავზარალდეთ. ჩვენ ყველაფერს ვაკეთებთ,რომ ამან შეძლებისდაგვარად უმტკივნეულოდ ჩაიაროს. ეს ისეთივეა, რომ ავადმყოფს უნდა ატკინო, რათა მერე თავი კარგად იგრძნოს. მე მხარს ვუჭერ ამ გადაწყვეტილებას“ - განაცხადა შოთა ცანავამ.

მისივე განმარტებით, საქართველოში ახალი კორონავირუსი დაბალი აგრესიულობით გამოირჩეოდა და ეს იმ რეგულაციების დამსახურებაა, რომელიც ხელისუფლებამ მიიღო.

„ვირუსი ჩვენთან დაბალი აგრესიულად გამოირჩეოდა. ამის მიზეზი ისაა, რომ ღონისძიებები სწორად იყო გატარებული. აგრესიულობა სწორედ ამის ფონზე დაიჩრდილა. ჩვენმა ქვეყანამ ეს ეტაპი სწორად განვლო, თუმცა მაინც არსებობს საფრთხე. მთავარი კითხვაა, ვისწავლეთ თუ არა ამ ვირუსთან თანაარსებობა. პირველ რიგში ამ კითხვას ჩემს თავს ვუსვამ. ამ კითხვას პასუხი აკრძალვების მოხსნის შემდეგ გაეცემა. ჩვენ ვირუსების სამყაროში ვცხოვრობთ, მაგრამ უნდა ვისწავლოთ ამ უცნაურ ვირუსთან თანაცხოვრება. უნდა დავუჯეროთ სპეციალისტებს.

კითხვაზე, როდემდე მოგვიწევს ამ ვირუსთან თანაცხოვრება, პირდაპირი პასუხის გაცემა შეუძლებელია. ამას რომ უპასუხო ან ვანგა უნდა იყო, ან - უცოდინარი ან ავანტიურისტი. ეს ანალიზის საკითხია“ - აღნიშნა შოთა ცანავამ.

მან ასევე მოუწოდა საზოგადოებას, არ შეიკავონ თავი ბავშვების გეგმიური აცრებისგან, რადგან გავრცელებული მოსაზრება, თითქოს იმუნიზაციისას ბავშვის იმუნიტეტი ქვეითდება და ის რეზისტენტული ხდება კორონავირუსის მიმართ, სიმართლეს არ შეესაბამება.