ამირან გამყრელიძე: ხაზგასმით მინდა გითხრათ, რომ ქვეყანაში ეპიდსიტუაცია კონტროლირებადია

რაც ბოლო ოთხი-ხუთი დღის განმავლობაში ხდება, 9-13-14-15 შემთხვევა რომ გვაქვს ყოველდღიურად, პრინციპში, ეს პროგნოზირებად იყო და არ არის მოულოდნელობა, - ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ მთავრობის ადმინისტრაციაში გამართულ ბრიფინგზე განაცხადა.

მისი თქმით, შემთხვევათა მატება პროგნოზირებადი იყო იმ თვალსაზრისით, რომ ეკონომიკა იხსნება, მეტი მობილობაა.

„ეს არც პანიკის საფუძველია და არც შეშფოთების, თუმცა სიფრთხილე აუცილებლად გვმართებს. ეს ყველაფერი მართვადია და ხაზგასმით მინდა გითხრათ, რომ ქვეყანაში ეპიდსიტუაცია კონტროლირებადია და ამ ტემპით სვლის შემთხვევაში, ჩვენ არავითარი პრობლემა არ შეგვექმნება და ჯანდაცვის სისტემა მართავს ამ ინფიცირებულებს. ერთი ასეთი დინამიკა შეიმჩნევა, რომ გარკვეულად, იმატებს მსუბუქ შემთხვევათა რიცხვი საშუალო და მძიმე შემთხვევებთან მიმართებით და ეს ახალი დადასტურებული შემთხვევებიც კლინიკურად შედარებით უფრო დამაკმაყოფილებლად მიმდინარეობს“, - განაცხადა ამირან გამყრელიძემ.