თენგიზ ცერცვაძემ განმარტა, რაზეა დამოკიდებული კორონავირუსის საწინააღმდეგო ვაქცინის ეფექტიანობა

ვაქცინასთან დაკავშირებით ჯერჯერობით წინააღმდეგობრივი მონაცემებია და არ არის ერთიანი აზრი. უპირველეს ყოვლისა, საერთოდ არ არის ჯერ ცნობილი, რომ ვაქცინას რომელსაც შექმნიან, იქნება თუ არა ეფექტიანი და შეძლებს თუ არა ის დაიცვას ადამიანი კოვიდისგან - ამის შესახებ თბილისის ინფექციური საავადმყოფოს დირექტორმა იმედის გადაცემა „ღია ეთერში“ განაცხადა.

თენგიზ ცერცვაძის განმარტებით, არ არის გადაწყვეტილი მთავარი საკითხი: ტოვებს თუ არა კოვიდი გამოჯანმრთელებულ ადამიანში მყარ იმუნიტეტს.

„თუ ის ტოვებს მყარ იმუნიტეტს, მაშინ ვაქცინა დიდი ალბათობით იქნება ეფექტიანი. თუ ის მყარ იმუნიტეტს არ ტოვებს და გუშინ გამოქვეყნდა სერიოზული კვლევა, რომ მყარ იმუნიტეტს არ ტოვებს კოვიდი, ამ შემთხვევაში ძალიან გაძნელდება ვაქცინის შექმნა, თუმცა მეცნიერებს აქვთ გარკვეული ტექნოლოგიური ნიუანსები, რომლითაც შეუძლიათ ხელოვნურად შექმნილი ვაქცინა ეფექტიანი იყოს მაშინაც კი, თუ ის არ ტოვებს ბუნებრივ იმუნიტეტს. კერძოდ, ისინი აძლიერებენ ამ ვაქცინაში შემავალ ცილებს ადიუვანტებით, რომ ის უფრო იმუნოგენური გახდეს და იმუნიტეტის გამოუშავებას ხელი შეუწყოს. ყოველ შემთხვევაში დიდი იმედები აქვთ“- განმარტა თენგიზ ცერცვაძემ.

მისივე თქმით, ოქსფორდის ვაქცინასთან დაკავშირებით მიღებულია გადაწვეტილება, რომ კვლევის დასრულებამდე, ის წარმოებაშია ჩაშვებული.

„ჩაშვებულია უზარმაზარი რაოდენობით. ანუ მიდიან იმაზე, რომ ვაქცინა, რომლის ეფექტიანობა ჯერ დადასტურებული არ არის, მაგრამ რაღაც იმედი არსებობს, უკვე ჩაუშვეს წარმოებაში. ვფიქრობ, ან ისინი წავიდნენ დიდ რისკზე, იმიტომ რომ, თუ გაუმართლად დიდ მოგებას ნახავენ. თუ არ გაუმართლათ, დიდ ზარალს ნახავენ“- განაცხადა თენგიზ ცერცვაძემ.