აჭარის მთავრობის სხდომაზე ეპიდვითარებაზე იმსჯელეს

აჭარის მთავრობის სხდომაზე ეპიდვითარებაზე იმსჯელეს. თორნიკე რიჟვაძის თქმით, ჯანდაცვამ გარკვეულწილად მოახდინა სიტუაციის სტაბილიზაცია, თუმცა პროვოცირებას ახდენს წინასაარჩენო გარემო. რიჟვაძემ პოლიტიკურ ძალებს მოუწოდა, გამოიჩინენ მეტი პასუხისმგებლობა და მოერიდონ ხალხმრავალ შეხვედრებს.

„ბოლო კვირების განმავლობაში ჩვენ შევძელით, რომ მაქსიმალურად დაგვესტაბილურებინა ეპიდვითარება რეგიონში, რაშიც პირველი როლი და ცენტრალური მნიშვნელობის სამუშაო გასწია ჯანდაცვის სამინისტრომ. სესტემურად, სრულად არის დალაგებული როგორც პაციენტების მართვა ოჯახებში, ასევე სტაციონარში, აჭარაში პირველად პილოტურად ამოქმედდა კოვიდსასტუმროები. შესაბამისად, ყველა პაციენტი, რომელსაც ესაჭიროება ძირითადი სამედიცინო სერვისები, აქვს ხელმისაწვდომობა. თუმცა, ამავე დროს ჩვენ გავხსენით საზოგადოებრივი ტრანსპორტი, რამაც შესაბამისად მობილობა გაზარდა, ასევე პოლიტიკური პროცესია - ქვეყანაში მალე გაიმართება არჩევნები და წინასაარჩევნო პერიოდში წინასაარჩევნო აგიტაციიდან, კამპანიიდან გამომდინარე რიგი უპასუხისმგებლო პოლიტიკოსები ვერ იკავებენ თავს იმ მოწოდებებისგან, იმ რეკომენდაციებისგან, რაც ჩვენ გვაქვს ეპიდემიოლოგებისგან, ამიტომ, მე მათ კიდევ ერთხელ მინდა მოვუწოდო, პირადი პოლიტიკური ამბიციების გამო ნუ დააყენებენ საფრთხის ქვეშ ჩვენი მოქალაქეების, განსაკუთრებით ბათუმელების სიცოცხლეს, ჯანმრთელობას. მაქსიმალურად დაიცვან ის რეკომენდაციები, რომლებიც ჩვენ გვაქვს და შეკრებებიც გააკეთონ სწორედ ამ წესების დაცვით. და ჩვენ, ერთობლივად მოქალაქეების პასუხისმგებლობით, რეკომენდაციების დაცვის აუცილებლად შევძლებთ ვითარების სტაბილურად მართვას მომავალშიც.

დღეს ერთ-ერთი მნიშვნელოვანი საკითხი, რაც განიხილება მთავრობის სხდომაზე გახლავთ 2021 წლის მთავრობის ბიუჯეტი. მინდა აღვნიშნო, რომ მიუხედავად გლობალური პანდემიისა, ეკონომიკურმა გუნდმა მოახერხა, რომ ბიუჯეტი დაიგეგმოს ზრდით, 3,2%-იანი ზრდით. რეალურად, ეს ნიშნავს , რომ არცერთი პროექტი, არცერთი ინფრასტრუქტურული პროექტი, მათ შორის, არცერთი სოციალური პროექტი არ გაჩერდება.
ასევე, ჩვენ გვქონდა აღებული გარკვეული ვალდებულებები იგივე კულტურის, განათლების სფეროში მოღვაწე მუშაკების მიმართ ხელფასების ზრდის ნაწილში და შესაბამისად, არც ეს ვალდებულებები იქნება გადავადებული. შესრულდება ყველაფერი ამ წლის ბიუჯეტში. აღვნიშნავ, რომ ის დიდი და მნიშვნელოვანი ინფრასტრუქტურული პროექტები, რომლებიც იყო დაგეგმილი შეუფერხებლად განხორციელდება. ასევე, მუნიციპალიტეტების კუთხითაც გათვალისწინებული გვაქვს კაპიტალური ტრანსფერები", - განაცხადა რიჟვაძემ.