დღეს ჩინეთში კორონავირუსის 17 ახალი შემთხვევა დაფიქსირდა

დღეს ჩინეთში კოვიდ19 -ის 17 ახალი შემთხვევა დაფიქსირდა. 16-18 ნოემბერს ჩინეთს ყოველდღიურად 8 ახალი ინფიცირებული ჰყავდა. დღესდღეობით აქტიური 311 შემთხვევაა. ჩინეთში პანდემიის დაწყებიდან კორონავირუსზე ჩატარებულ ტესტზე პოზიტიური პასუხი მიიღო 86 398 ადამიანმა. გამოჯანმრთელდა 81 453 პაციენტი. გარდაიცვალა 4 634 ინფიცირებული.

კორონავირუსის პანდემიის მსოფლიო რუკაზე ინფიცირებულების რიცხვით ჩინეთი 67-ე ადგილზეა. ბოლო 9 თვეში ქვეყანაში 160 მილიონი ადამიანის ტესტირება მოხდა. ამ დროისათვის კრიტიკულია მხოლოდ ერთი ადამიანის ჯანმრთელობის მდგომარეობა.

ჩინეთის გარდა ერთი კრიტიკული პაციენტი ჰყავს რამდენიმე ქვეყანას. მათ შორისაა სინგაპური, ტაილანდი და ბოცვანა. გავრცელებული ინფორმაციის თანახმად, ჩინეთში მილიონზე მეტი მოქალაქე კოვიდ19 -ის წინააღმდეგ უკვე აცრილია.

სამი თვეა კორონავირუსზე Sinopharm-ის ვაქცინით აცრა ისე მიმდინარეობს, რომ ვაქცინის ეფექტიანობაზე კლინიკური კვლევა დასრულებული არ არის. სინოფარმის (Sinopharm) ვაქცინა ჯანდაცვის მსოფლიო ორგანიზაციის მონაცემების თანახმად, კლინიკური კვლევების მესამე ფაზაზეა და ფარმაკოლოგიური კომპანიიდან ჯანმო დოკუმენტაციას წლის ბოლომდე ელოდება. სინოფარმის პეკინის ინსტიტუტი ერთ ვაქცინაზე ჩინეთის დაავადებათა კონტროლისა და პრევენციის ცენტრთან თანამშრომლობს და მეორე ექსპერიმენტული ვაქცინა სინოფარმის ვუჰანის კვლევების ინსტიტუტმა ვუჰანის ვირუსოლოგიის ინსტიტუტთან ერთად მიიღო. ჩინეთის ხელისუფლებამ კანდიდატ ვაქცინას ავტორიზაცია 2020 წლის ივლისში მიანიჭა და მიზეზად მისი გამოყენების გადაუდებელი საჭიროება დაასახელა. კომპანიაში აცხადებენ,რომ ჩინეთის ხელისუფლებას შეუძლია პირობითი ნებართვა კლინიკური ცდების სტადიაზე მყოფ ვაქცინებზე გასცეს მაშინ, როდესაც საზოგადოებრივ ჯანდაცვაში საგანგებო მდგომარეობაა შექმნილი.

„თითქმის მილიონმა ადამიანმა მიიღო ვაქცინა და სერიოზული გართულება არცერთ შემთხვევას არ მოჰყოლია. დაფიქსირდა მხოლოდ მსუბუქი სიმპტომები”,- განაცხადა ჩინეთის ნაციონალური ფარმაკოლოგიური ჯგუფის ხელმძღვანელმა ლიუ ძინჟჟენიმ.

ამ განცხადების დამადასტურებელი ოფიციალური დოკუმენტაცია ხელმისაწვდომი არ არის. კომპანიაში ამბობენ, რომ სინოფარმის ექსპერიმენტული ვაქცინა კოვიდ 19 -ზე ორი დოზისგან შედგება და 14 დღის შუალედით კეთდება. კომპანიამ ბრაზილიასთან მომავალი ვაქცინის დისტრიბუციაზე კონტრაქტი უკვე გააფორმა.

შეთანხმების საფუძველზე, სინოვაკის ვაქცინის 60 მილიონი დოზა ბრაზილიამ უნდა მიიღოს და მარტში 40 მილიონი დოზა ინდონეზიამ. ჩინეთში კოვიდ 19 -ის წინააღმდეგ ვაქცინაზეც მუშაობენ სხვა ფარმაცევტული კომპანიებიც. ექსპერიმენტული ვაქცინა სახელწოდებით “კორონავაკი”( CoronaVac) მოამზადა ჩინურმა ბიოფარმაცევტიულმა კომპანიამ “Sinovac Biotech”-მა. კომპანიის წარმომადგენლები აცხადებენ, რომ კვლევების პირველი და მეორე ფაზა წარმატებით განხორციელდა.

სინოვაკის განცხადებით, დღესდღეობით კლინიკური კვლევების მესამე ეტაპი ვაქცინის ეფექტიანობის შესახებ სრულყოფილი ინფორმაციის მისაღებად ტარდება,რომელმაც უნდა დაადგინოს , თუ რამდენად ძლიერი იქნება და რამდენ ხანს შეინარჩუნებს კოვიდ19-ზე აცრილი მოხალისე იმუნიტეტს. თუმცა კვლევების ადრეული მონაცემებით, რომელიც 700 მოხალისეს ეყრდნობა, 14 დღის ინტერვალით გაკეთებული კორონავაკის 2 დოზა ვირუსისგან დასაცავად იმუნიტეტის გამომუშავებას 4 კვირაში იწვევს.

ჩინეთის ნაციონალური მედიკამენტების რეგისტრაციის ბიუროს ცნობით, ათი ათასობით ადამიანზე ჩინური ექსპერიმენტული ვაქცინის ტესტირებისთვის რამდენიმე ქვეყნიდან თანხმობა მიიღეს და კლინიკური კვლევების მესამე ფაზას პრობლემა არ შეექმნება. საერთო ჯამში ჩინეთში წარმოებული 4 ექსპერიმენტული ვაქცინის ცდები ბრაზილიაში, პაკისტანში,საუდია არაბეთში, რუსეთში, ინდონეზიასა და ბრაზილიაში ტარდება. გასულ კვირას სინოვაკის ვაქცინაზე კლინიკური კვლევის მესამე ფაზა ბრაზილიაში ექსპერიმენტში მონაწილე პირის გარდაცვალების გამო რამდენიმე დღით შეწყდა და მას შემდეგ განახლდა, რაც ექსპერტებმა განაცხადეს, რომ მოხალისის გარდაცვალების მიზეზი ექსპერიმენტული ვაქცინის გამოყენება არ ყოფილა. ჩინური ექსპერიმენტული ვაქცინები განსხვავდება Pfizer/BionTeck-ისა და Moderna-ა კანდიდატი ვაქცინებისგან. სინოვაკის ვაქცინაზე გამოყენებულია ვირუსის ქიმიურად ინაქტივირებული ვერსია. მაიმუნები, რომლებიც სინოვაკის მაღალი დოზით აცრეს და ვირუსი შეასუნთქეს, ინფექციას არ უჩიოდნენ. მათ ვირუსი ხახასა და ფილტვებში არ აღმოაჩნდათ. შუალედური კვლევა ჩატარდა 18-59 წლის ასაკობრივ ჯგუფში. ვაქცინით ინდუცირებული გამანეიტრალებელი ანტისხეულების პასუხი მოხალისეებს ვაქცინაციიდან 14 დღეში განუვითარდათ. ჯერ ცნობილი არ არის ,რამდენად შეუძლია ამ ექსპერიმენტულ ვაქცინას ადამიანების Covid19 -გან დაცვა.

გაერთიანებული საემიროები ჩინეთის შემდეგ პირველი ქვეყანაა, სადაც სინოფარმის ვაქცინას გადაუდებელი მოხმარებისთვის ავტორიზაცია მიანიჭეს. 2020 წლის ბოლომდე ჩინური ვაქცინის 10 მილიონი დოზის შეძენას გეგმავს თურქეთიც. ამერიკის შეერთებული შტატების სურსათისა და წამლის სააგენტოს მიერ გაცემული გზამკვლევის მიხედვით, ვაქცინის დასამტკიცებლად, პლაცებო- კონტროლირებულ კვლევაში ეფექტიანობოს პირველადი მიზანი სულ მცირე 50 % უნდა იყოს და ამიტომ კლინიკური კვლევების მესამე ფაზის შედეგებს ვაქცინის ეფექტიანობის შესახებ გადამწყვეტი მნიშვნელობა აქვს. 9 ოქტომბერს ჩინეთი ორგანიზაცია კოვაქსს (COVAX) შეურთდა. კოვაქსი 90 -მდე ქვეყნისთვის ვაქცინებზე წვდომის უზრუნველსაყოფაზე მუშაობს.