კორონავირუსის ახალი შტამი ბელგიაშიც დაფიქსირდა

კორონავირუსის ახალი შტამი ბელგიაშიც დაფიქსირდა. სპეციალისტები ამბობენ, რომ 1 600 პაციენტიდან კორონავირუსის ახალი ვარიანტი 4-ს აქვს და ჯერ არ არის ისე გავცელებული, როგორც COVID-19-ის აქამდე არსებული ვირუსი.

განცხადება კრიზისის ცენტრის სპიკერმა გააკეთა. „კორონავირუსის ახალი შტამი ბელგიაშიც არის აღმოჩენილი. მოქალაქეების საყურადღებოდ მინდა განვაცხადო, რომ ვირუსის მუტაცია ნორმალურია.

ეს არ არის სიურპრიზი. ასეთია ვირუსის ხასიათი. როგორც წესი, ახალი შტამებიდან ნაწილი მალევე ქრება და ნაწილი რჩება. ამ ეტაპზე დიდ ბრიტანეთში აღმოჩენილი ანუ ბრიტანული ვარიანტი უფრო სწრაფად ვრცელდება, ვიდრე ბელგიაში დადასტურებული შემთხვევა.

ამ დროისთვის ჩვენ ვერ დავადასტურებთ, რომ ახალი შტამი უფრო მძიმე გართულებებს იწვევს და რაც მთავარია, ვაქცინა იქნება ეფექტიანი ამ შემთხვევაში“, - განაცხადა კრიზისის ცენტრის სპიკერმა სტივენ ვან გუხტმა.

კრიზისის ცენტრში განაცხადეს, რომ ვირუსის გავრცელება მოქალაქეების მხრიდან პასუხისმგებლობის გამოჩენის ხარისხზეა დამოკიდებული და ზამთრის პერიოდი ვირუსული ინფექციებისთვის ხელსაყრელი დროა. ბელგიაში დღეს COVID-19-ით ინფიცირების 2 170 შემთხვევა დაფიქსირდა. ბოლო 24 საათში გარდაიცვალა 81 პაციენტი.

14 დეკემბერს მეცნიერებმა კორონავირუსის ახალი სახეობა აღმოაჩინეს. ჯანდაცვის მსოფლიო ორგანიზაციაში განაცხადეს, რომ ჯერ არ არსებობს იმის მტკიცებულება, რომ დიდ ბრიტანეთში აღმოჩენილი კორონავირუსის ახალი სახეობა სერიოზულ გავლენას ახდენს ვირუსის სტრუქტურაზე.

დიდი ბრიტანეთის ჯანდაცვის მდივანმა, მეთ ჰენკოკმა განაცხადა, რომ ვირუსის ახალი სახეობა შედარებით სწრაფად ვრცელდება, თუმცა უფრო საშიში არ არის.