როგორ მოქმედებს კორონავირუსის სამკურნალო პრეპარატი, რომელმაც ისრაელში კვლევის დროს 95%-იანი ეფექტიანობა აჩვენა

ისრაელში, თელ-ავივის სურასკის სახელობის სამედიცინო ცენტრში კორონავირუსის საწინააღმდეგო პრეპარატის კლინიკური ცდების პირველი ეტაპი წარმატებით დასრულდა. ამის შესახებ Times of Israel-ი წერს.

გამოცემის ინფორმაციით, პრეპარატი, სახელწოდებით EXO-CD24 30 კოვიდინფიცირებულ პაციენტზე გამოსცადეს, რომლებთანაც COVID-19 საშუალოდ ან მძიმედ მიმდინარეობდა. 29 მათგანი 5 დღეში გამოჯანმრთელდა.

პრეპარატი ებრძვის ციტოკინურ შტორმს - იმუნური სისტემის პოტენციურად ლეტალურ რეაქციას კორონავირუსზე, რომელიც სავარაუდოდ COVID-19-თან დაკავშირებული გარდაცვალებების უდიდეს ნაწილს იწვევს. პრეპარატს ცილა CD24 პირდაპირ პაციენტის ფილტვებში გადააქვს, რაც ინფიცირებულს იმუნური სისტემის დაწყნარებაში ეხმარება.

წამლის მიღება ინჰალაციით ხდება. მკურნალობა 5 დღეს გრძელდება. ადამიანმა პრეპარატი დღეში ერთხელ, რამდენიმე წუთის განმავლობაში უნდა ჩაისუნთქოს.

პრეპარატთან დაკავშირებით ინფორმაციას საქართველოში ისრაელის საელჩოც ავრცელებს.

„დღეს არსებული მონაცემებით COVID-19-ს აქვს ორი საკვანძო ეტაპი. პირველ ეტაპზე მის მიმართ მხოლოდ სიმპტომური მკურნალობა გამოიყენება. ხოლო მეორე ეტაპზე, გართულების შემთხვევაში, ვითარდება ე.წ. ციტოკინური შტორმი. დღემდე, ჯერ ვერც ერთმა პრეპარატმა ვერ შეძლო კორონავირუსის ამ ეტაპის მიმართ სამკურნალო საშუალების ეფექტურობის დადასტურება.

როგორც სურასკის სამედიცინო ცენტრის პროფესორი ნადირ არბერი აღნიშნავს, რომელსაც ასევე დიდი წვლილი მიუძღვის ამ პრეპარატის შექმნაში, ვაქცინა უმნიშვნელოვანესი ფაქტორია პანდემიის შესაკავებლად და გასანეიტრალებლად, მაგრამ მისი სრულად გაქრობა ძნელად წარმოსადგენია, ამიტომ სამკურნალო საშუალება ერთ-ერთი მთავარი ფაქტორია, რომ ამ ვირუსის საფრთხე საბოლოოდ განეიტრალდეს.

შესაბამისად, პრეპარატის პირველი ფაზის შედეგები ძალზედ დამაიმედებელია და ველით, რომ გარდამტეხ ცვლილებებს შეიტანს COVID-19-თან ბრძოლაში“, - ნათქვამია საელჩოს განცხადებაში.

ახლა EXO-CD24 კვლევის უფრო ფართო სტადიაზე გადავა, თუმცა ცენტრში მიიჩნევენ, რომ პრეპარატს COVID-19-ის სერიოზული შემთხვევების მკურნალობის წესის შეცვლა შეუძლია.