თამარ გაბუნიამ განმარტა, რა ეტაპები გაიარა სახელმწიფომ საქართველოში კოვიდვაქცინების შემოსატანად

თამარ გაბუნიამ ბრიფინგზე იმ ეტაპებზე ისაუბრა, რომლებიც საქართველომ კორონავირუსის საწინააღმდეგო ვაქცინის მისაღებად გაიარა.

ჯანდაცვის მინისტრის მოადგილის თქმით, საქართველო კოვაქს-პლატფორმას 2020 წლის 18 სექტემბერს შეუერთდა, 8 ოქტომბერს კი ქვეყანამ გადაიხადა 5 მილიონზე მეტი დოლარი იმისთვის, რომ წლის ბოლომდე მოსახლეობის 20%-ის ვაქცინაცია უზრუნველყოფილი ყოფილიყო.

„ვაქცინის დანერგვის გეგმაზე მუშაობა დაიწყო 2020 წლის ნოემებერში. ეს არის ერთ-ერთი მთავარი პირობა იმისთვის, რომ ქვეყნის მზაობა ვაქცინის დანერგვისთვის შეფასდეს დადებითად. გეგმა შემუშავდა და დამტკიცდა მთავრობის განკარგულებით 2021 წლის 21 იანვარს. 18 იანვარს ქვეყანამ გააკეთა განაცხადი კოვაქსის პლატფორმაზე მზაობის დასადასტურებლად, რომ ის მზად არის მიიღოს ნებისმიერი ცივი ჯაჭვის მოთხოვნების ვაქცინა, მათ შორის „პფაიზერი“, „ასტრაზენეკა“ და „მოდერნა“. „მოდერნა“ ან დროისთვის კოვაქსის პლატფორმაზე არ განიხილება. ამდენად ჩვენ ვმუშაობთ 2 ვაქცინის მოწოდებაზე. 28 იანვარს ქვეყანა მიიღო მზაობის შეფასების საფუძველზე დამადასტურებელი წერილი, რომ მას გადაეცემა „პფაიზერის“ 29 000 დოზა და ასევე 180-დან 300 000-მდე „ასტრაზენეკას“ დოზა. 28 იანვრის შემდეგ ქვეყანამ დაიწყო აქტიურად მუშაობა შესყიდვის პროცედურებზე, როგორც მიმწოდებებლებთან, ასევე კოვაქსის გუნდთან. შესყიდვის პროცედურა არის სტანდარტული, როგორც პფაიზერისთვის, ასევე „ასტრაზენეკასთვის“, რადგან ჩვენ ვმუშაობთ კოვაქსის პლატფორმის გზით. „ასტრაზენეკას“ შემთხვევაში ქვეყანამ გაიარა პასუხისმგებლობების, დაზღვევის, ხელშეკრულების ეტაპი. ეს არის ერთი ეტაპი. ზუსტად იგივე ეტაპი არის გასავლელი პფაიზერთან მიმართებაში. როდესაც ჩვენ ველოდით „პფაიზერის“ ვაქცინის ქვეყანაში შემოტანას თებერვლის შუა რიცხვებიდან, შუალედური კომუნიკაციების შემდეგ კოვაქსმა გვაცნობა, რომ არის გარკვეული დამატებითი მოთხოვნები „პფაიზერის“ მიერ, რომელიც არანაირად არ უკავშირდება ქვეყნის ტექნიკურ მზაობას ვაქცინის მიღებისთვის და დაკავშირებულია პასუხისმგებლობის ფინანსურ გადაზღვევასთან, რომლის დეტალებს 23 თებერვლის წერილში კოვაქსი ვერ გვატყობინებს", - განაცხადა თამარ გაბუნიამ.