ანგელა მერკელი აცხადებს, რომ ე.წ. ინდური შტამის გავრცელების გამო, ევროპა კორონავირუსთან ბრძოლაში დანის პირზე დადის

გერმანიის კანცლერმა, ანგელა მერკელმა განაცხადა, რომ ე.წ. ინდური შტამის გავრცელების გამო, ევროპა კორონავირუსთან ბრძოლაში დანის პირზე დადის.

გერმანიის კანცლერმა ასევე განაცხადა, რომ პანდემიაზე შემდგომი რეაგირება ევროკავშირის ლიდერების სამიტის განხილვის მთავარი თემა იქნება.

„მიუხედავად იმისა, რომ იმედის საფუძველი არსებობს, პანდემია ჯერ არ დასრულებულა, განსაკუთრებით მსოფლიოს ღარიბ ქვეყნებში. მაგრამ გერმანიასა და ევროპაში ჩვენც ჯერ კიდევ დანის პირზე გავდივართ. ფხიზლად უნდა ვიყოთ. ახლად გამოვლენილი ვარიანტები, განსაკუთრებით დელტას ვარიანტი, ცხადყოფს, რომ სიფრთხილე უნდა შევინარჩუნოთ“, - აღნიშნა ანგელა მერკელმა.

23 ივნისს დაავადებათა კონტროლის ევროპულ ცენტრში განაცხადეს, რომ აგვისტოს ბოლოს ე.წ. ინდური შტამი ევროკავშირში შემთხვევების 90%-ს შეადგენს.

„სამწუხაროდ, წინასწარი მონაცემები ცხადყოფს, რომ აღნიშნულ შტამს შეუძლია დააინფიციროს ის პირებიც კი, რომლებმაც ამჟამად არსებული ვაქცინების მხოლოდ ერთი დოზა მიიღეს. ძალიან სავარაუდოა, რომ დელტას ვარიანტი ფართო მასშტაბით გავრცელდება ზაფხულის განმავლობაში, განსაკუთრებით ახალგაზრდებს შორის“, - განაცხადა დაავადებათა კონტროლის ევროპული ცენტრის ხელმძღვანელმა, ანდრეა ამონმა.

11 მაისს ჯანდაცვის მსოფლიო ორგანიზაციის კორონავირუსთან ბრძოლის ტექნიკური ჯგუფის ხელმძღვანელმა, მარია ვან კერკხოვემ განაცხადა, რომ კორონავირუსის ვარიანტი, რომელიც პირველად გასულ წელს ინდოეთში გამოვლინდა, კლასიფიცირდება როგორც შემაშფოთებელი ვარიანტი.