თამარ გაბუნია: ვაქცინაციის გეგმაში „დოზის დანაკარგი“ პროგნოზულად 15%-ია, „ასტრაზენეკას“ შემთხვევაში დანაკარგმა 3%, „ფაიზერის“ შემთხვევაში კი 0,3% შეადგინა

ნამდვილად არ არის მისაღები ჩვენთვის, რომ მოქალაქე, რომელიც მიდის აცრის ცენტრში და გეგმავს აცრა ჩაიტაროს, ვერ იღებს მისთვის განკუთვნილ დოზას. რა თქმა უნდა, ეს არის სერიოზული ხარვეზი, - ამის შესახებ ჯანდაცვის მინისტრის პირველმა მოადგილემ, თამარ გაბუნიამ ვაქცინების შენახვის ადგილიდან მიმწოდებელ დაწესებულებამდე მისი გადაცემის პროცესში დაფიქსირებულ ხარვეზზე საუბრისას განაცხადა.

მისი თქმით, ამას მოჰყვა ჯანდაცვის სამინისტროს პასუხი და აუდიტის სამსახურის მობილიზება იმისთვის, რომ ყველა დონეზე ასეთი ხარვეზების რისკები შეფასდეს და მოხდეს მაქსიმალური გადაზღვევა.

ამასთან, თამარ გაბუნია გამოეხმაურა გავრცელებულ ინფორმაციას, რომ სისტემაში ვაქცინის დოზები დაიკარგა.„კონკრეტულად „ასტრაზენეკას“ ვაქცინების ადმინისტრირებასთან დაკავშირებით, მინდა, ვრცელი განმარტება გავაკეთო. „ასტრაზენეკას“ ვაქცინები ქვეყანამ „კოვაქსის“ პლატფორმიდან შეისყიდა 129 ათასი დოზის ოდენობით, აქედან 86 ათასი დოზა მიიღო იმ ვადებში, რომელშიც იყო დადგენილი და დარჩენილ 43 ათასს ველოდებოდით ჩვენ უკვე მაისის დასაწყისიდან, თუმცა გარკვეული მიზეზებით ეს გადავადდა და ბოლო ვადა, რომელიც იყო დათქმული, არის 22 ივნისი, რაზეც იყო აწყობილი ლოგისტიკურად ჩვენი მიწოდების სქემა. ესეც გადავადდა და ამან გამოიწვია მოწოდებაში შეფერხება. ახლა რაც შეეხება დოზებთან დაკავშირებულ პრობლემას, გაჟღერდა არაერთხელ, რომ რაღაც დოზა დაიკარგა, სადღაც გაქრა. რა თქმა უნდა, ეს ყველაფერი არის უტრირებული აღწერა იმ სიტუაციის, რომელთანაც საქმე გვაქვს. „დოზის დანაკარგი“ არის ტექნიკური ტერმინი ვაქცინაციის პროგრამაში. ჩვენი გეგმით, პროგნოზული დანაკარგი არის 15%. ჩვენ შემთხვევაში, გამომდინარე იქიდან, რომ „ასტრაზენეკას“ ვაქცინების დოზები არის 10-დოზიანი, ყველაზე მაღალი დანაკარგი გამოვიდა „ასტრაზენეკას“ შემთხვევაში, რაც არის 3%. ეს ზოგადად პროგნოზულ მაჩვენებელთან და ასევე, საერთაშორისო პრაქტიკასთან შედარებით არის საკმაოდ დაბალი მაჩვენებელი. რაც შეეხება „სინოფარმისა“ და სინოვაკის დოზების დანაკარგს, პრაქტიკულად, არის ნული, ერთეული შემთხვევა იყო, როდესაც გატყდა, დაზიანდა და ვერ გამოიყენა ექთანმა შემდეგ დოზა. 0,3% კი არის „ფაიზერის“ შემთხვევაში და ესეც უკავშირდება მექანიკურ დაზიანებას. ამდენად, ეს არის ჩვეულებრივი მიმდინარე ფაქტორი ვაქცინაციის პროგრამაში. რასაც აუდიტის სამსახურიც სწავლობს და რაც არ გვინდა, რომ განმეორდეს სამომავლოდ, როდესაც მასშტაბი ვაქცინაციის იქნება ძალიან დიდი - მიწოდების პროცესში არ უნდა შეფერხდეს ვაქცინის გადაცემა მისი შენახვის ადგილიდან ვაქცინაციის მიმწოდებელ დაწესებულებაში. ეს ხარვეზი გამოვლინდა, პირველ რიგში და ამას აუდიტი უკვე ყველა დონეზე შეისწავლის იმისთვის, რომ ლოგისტიკის ჯაჭვი იყოს სრულად გამართული და მსგავსი პრობლემები არ შეიქმნას“, - განაცხადა გაბუნიამ.