თამარ გაბუნია: ამერიკის მთავრობასთან მიდის მუშაობა, რომ ამერიკული წარმოების ვაქცინები ქვეყანაში ძალიან სწრაფად შემოვიდეს

საბედნიეროდ, საქართველოში მოთხოვნა ვაქცინაციაზე კარგია, - ამის შესახებ თამარ გაბუნიამ „იმედის დილაში“ განაცხადა. ჯანდაცვის მინისტრის მოადგილის თქმით, საზოგადოებაში მოთხოვნა ყველა დასახელების ვაქცინაციაზე გაიზარდა.

„თავიდან იყო გარკვეული კითხვის ნიშნები და მერყეობა იმასთან დაკავშირებით, თუ რომელი ვაქცინით უნდა აიცრას ადამიანი. დღეს ვხედავთ, რომ უკვე იზრდება ჯავშნების რაოდენობა Sinopharm-ზე, Sinovac-ზეც. AstraZeneca-ზეც მოთხოვნა გაიზარდა. Pfizer-ზე მოთხოვნა არის ყველზე მაღალი. სხვა ქვეყნების გამოცდილება ისეთია, რომ მოსახლეობის 40% ვაქცინას იკეთებს საკუთარი სურვილით, მარტივად და ენთუზიაზმით. ჩვენ ჯერჯერობით ვერ მივედით ამ 40%-მდე. დაახლოებით 5%-ის ფარგლებში ვართ ორჯერ ვაქცინირებულების რაოდენობით, რაც კიდევ გვაძლევს იმის საშუალებას ვივარაუდოთ, რომ მომდევნო 2-3 თვე იქნება ძალიან დატვირთული, აქტიური“, - განაცხადა გაბუნიამ.

მან გუშინ Pfizer-ზე რეგისტრაციასთან დაკავშირებით შექმნილ პრობლემებზე ისაუბრა და აღნიშნა, რომ ვაქცინაციის ყველა მსურველი შეძლებს აცრაზე დარეგისტრირებას.

„კონკრეტულად Pfizer-ის მილიონ დოზაზე ვსაუბრობთ, რაც არის ხელშეკრულების ფარგლებში ნაყიდი. გარდა ამისა, მიდის მუშაობა ამერიკის მთავრობასთან დონაციასთან დაკავშირებით. ჯერჯერობით დაზუსტებული არ გვაქვს ინფორმაცია, თუმცა აქაც საუბარია ამერიკული წარმოების ვაქცინებზე, რომლებიც ქვეყანაში ძალიან სწრაფად უნდა შემოვიდეს. ის საწყისი დოზები, რომელიც გუშინ გაიხსნა, არის მხოლოდ დასაწყისი. ნამდვილად არ იყო საჭირო ამდენი ნერვიულობა და აჟიოტაჟი“, - დასძინა მინისტრის მოადგილემ.

მისივე თქმით, რეგისტრაციის ვებგვერდის შეფერხებით მუშაობის მიზეზები აუცილებლად გამოვლინდება.