ზურაბ აზარაშვილი: ის კლინიკები, რომელიც თურქეთში, ისრაელსა და ესპანეთში შევარჩიეთ, სრულად ფარავს ბავშვთა ონკოლოგიის ნებისმიერ მიმართულებას და ამ მხრივ გამოჯანმრთელების შანსები მაქსიმუმამდეა აყვანილი

ის კლინიკები, რომელიც თურქეთში, ისრაელსა და ესპანეთში შევარჩიეთ, სრულად ფარავს ბავშვთა ონკოლოგიის ნებისმიერ მიმართულებას და ამ მხრივ გამოჯანმრთელების შანსები მაქსიმუმამდეა აყვანილი, - ამის შესახებ ჯანდაცვის მინისტრმა „ქრონიკაში“ ჩართვისას განაცხადა.

ზურაბ აზარაშვილის განმარტებით, პრემიერის ინიციატივით, სახელმწიფომ საფუძველი ჩაუყარა ისტორიულ პროექტს, რომელიც ონკოლოგიური დიაგნოზის მქონე ყველა ბავშვისთვის ხარისხიან ჯანდაცვას უზრუნველყოფს.

მისი თქმით, თურქეთში, ესპანეთსა და ისრაელში არსებული სამი კლინიკა სამინისტრომ მათი გამოცდილებისა და ხარისხის გარანტიის მიხედვით შეარჩია.

„ასევე იყო გერმანიისა და საფრანგეთის კლინიკები, თუმცა საბოლოოდ, ვინც გამოთქვა სურვილი და ყველა არსებულ კრიტერიუმს აკმაყოფილებდა, რომელიც დაკავშირებულია ხარისხთან, შედეგთან და ასევე მოლაპარაკების ნაწილში მნიშვნელოვანი იყო ფინანსური მხარეც, აღნიშნულ სამ კლინიკაზე შევჯერდით და დღეს უკვე საბოლოოდ, ეს ისტორიული გადაწყვეტილება დაგვირგვინდა ხელშეკრულებით. ბავშვებს უკვე შეუძლიათ კლინიკებში მკურნალობა. აღნიშნულიდან გამომდინარე, ის კლინიკები, რომელიც თურქეთში, ისრაელსა და ესპანეთში შევარჩიეთ, სრულად ფარავს ბავშვთა ონკოლოგიის ნებისმიერ მიმართულებას და ამ მხრივ გამოჯანმრთელების შანსები მაქსიმუმამდეა აყვანილი“, - განაცხადა ჯანდაცვის მინისტრმა.

ჯანდაცვის სამინისტროს „სოლიდარობის ფონდსა“ და პარტნიორ კლინიკებს შორის ხელშეკრულებები დღეს გაფორმდა. პროექტის ფარგლებში, ონკოლოგიური დიაგნოზის მქონე ბავშვები, მკურნალობას ისრაელში, ესპანეთში, თურქეთსა და საქართველოში სახელმწიფოს სრული დაფინანსებით შეძლებენ.

პროგრამის პარტნიორი კლინიკებია: თურქეთის „ანადოლუს სამედიცინო ცენტრი“, ესპანეთის „ქირონ სალუდის პროტონოთერაპიის ცენტრი“ და „თელ-ავივ სოურასკის (იხილოვის) სამედიცინო ცენტრი“.

პაკეტი მოიცავს დიაგნოსტიკასა და სტანდარტული მკურნალობის კურსს: ქიმიოთერაპიას, სხივურ თერაპიას, ოპერაციულ ჩარევას. ასევე - პროტონოთერაპიას, პაციენტის საჭიროებებიდან გამომდინარე.