რატომ აღაშფოთა გერმანია ჯგუფ Rammstein-ის ახალმა ვიდეორგოლმა. გარჩევა

გერმანულმა ჯგუფმა Rammstein-მა თითქმის 10-წლიანი პაუზის შემდეგ ახალ სიმღერაზე ვიდეორგოლი გამოუშვა და ის მალევე გაეხვია კრიტიკის ქარცეცხლში. სიმღერას ჰქვია Deutschland (გერმანია) და ის გერმანიის ისტორიას ეხება. 

ვიდეორგოლის პრემიერამდე რამდენიმე დღით ადრე, სოციალურ ქსელში თიზერი გამოქვეყნდა - სცენა, რომელშიც საკონცენტრაციო ბანაკში ტყვეებს ახრჩობენ. ამ ეპიზოდით ბევრი აღშფოთდა. გერმანიაში ანტისემიტიზმთან ბრძოლაში უფლებამოსილი ფელიქს კლაიანი და ებრაელთა კავშირის ყოფილი თავმჯდომარე შარლოტა კონბლოჰი აცხადებდნენ, რომ ჯგუფმა „წითელ ზღვარს გადააბიჯა“. Rammstein-ს ჰოლოკოსტის კომერციალიზაციასა და ნაცისტების მიმართ სიმპათიაში ადანაშაულებდნენ. 

მიუხედავად იმისა, რომ ვიდეორგოლის სრული ვერსიის გამოქვეყნების შემდეგ აღმოჩნდა, რომ ამბავი ზოგადად გერმანიის ისტორიას ეხებოდა, გერმანული ჯგუფის მიმართ პრეტენზიები არ წყდება, თუმცა არსებობენ ის ადამიანებიც, რომლებსაც სიმღერა Deutschland მოეწონათ და ვიდეოს სიმბოლიზმში გარკვევას ცდილობენ.

ბრძოლა რომაელებთან

კლიპი ტყის სცენით იწყება - რომაელების არმია ხვდება მსახიობ რუბი კომის, რომელიც გერმანიას განასახიერებს. ქალი თავს აჭრის მეომარს, რომელსაც Rammstein-ის სოლისტის ტილ ლინდერმანის სახე აქვს. ზოგ ჟურნალისტს მიაჩნია, რომ ეს ტეტუბორგის ტყის ბრძოლის (ახ.წ. 9 წელი) სცენაა, რომელსაც გერმანელი ნაციონალისტები გერმანელი ხალხის ძალის სიმბოლოდ აღიქვამენ, რომელმაც დაამარცხა რომის იმპერია, თუმცა თავად ვიდეოს ტიტრებში სხვა წელია მითითებული - ახ.წ. 16 წელი - ანუ ის დრო, როდესაც რომაელებმა გერმანელები დაამარცხეს.

„გინდენბურგი“

ერთ-ერთ სცენაში დირიჟაბლის აფეთქება ჩანს. ეს „გინდენბურგია“, რომელიც ნაცისტურ გერმანიაში 1936 წელს შექმნეს და 1937 წელს ნიუ-ჯერსიში აფეთქდა. მაშინ 36 ადამიანი დაიღუპა. „გინდერბურგის“ შემდეგ, ამ მოწყობილობის მიმართ ნდობა გაქრა. Rammstein-ის ჯგუფის წევრები აფეთქების ფონზე მოაბიჯებენ და მომდევნო კადრში უკვე მეორე მსოფლიო ომი ჩანს. 

წიგნების დაწვა

ვიდეოს ერთ-ერთი ეპიზოდში შუასაუკუნეების ბერები უცნობ ადამიანს წვავენ, რის შემდეგაც, ფაშისტების ფორმაში გადაცმული ადამიანები წიგნებს წვავენ. ეს ჰენრიხ ჰეინეს ციტატაა, რომელიც ამბობდა „იქ სადაც წიგნებს წვავდნენ, შემდეგ ადამიანებს დაწვავენ“. იმავე სცენაზე, ნაცისტები ბერებს ეხუტებიან. ზოგიერთი ფანის აზრით, ეს ჰიტლერის ოფიცრების და ეკლესიის თანამშრომლობის სიმბოლოა და ის, რომ ნაციზმს გერმანიის ისტორიაში ღრმა ფესვები აქვს. ჰიტლერის სისასტიკემდე, გერმანიის ისტორიას ახსოვს კათოლიკებისა და პროტესტანტების სისხლიანი კონფლიქტები და ერეტიკოსების ხანგრძლივი დევნა. 

კონცენტრაციული ბანაკი

ყველაზე დიდი აღშფოთება გერმანიაში კონცენტრაციული ბანაკის ტყვეებთან დაკავშირებულმა სცენამ გამოიწვია. ერთ-ერთ ტყვეს ფულზე ყვითელი ექვსქიმიანი ვარსკვლავი აქვს, რომელიც ნაცისტურ გერმანიაში ებრაელებს ეკეთათ, - პირველს მას ჩამოახრჩობენ. მეორე ტყვეს ვარდისფერი სამკუთხედი უკეთია - ასეთების ტარებას ფაშისტები ჰომოსექსუალებს აიძულებდნენ.

სცენის დასაწყისში ლინდერმანი კამერაში მღერის: Deutschland über allen („გერმანია ყველაზე მაღლა“) - ეს ძველი გერმანული ჰიმნის სტრიქონია, რომელიც ომის შემდეგ ნაცისტურ სლოგანად აღიქმება. 

სცენის ფინალში ტყვეები თავისუფლდებიან და ბანაკის ხელმძღვანელებს კლავენ.

წითელი არმიის ფრაქცია

სცენა, რომელშიც Rammstein-ის სოლისტს ლინდემანს ქალის ტანსაცმელი აცვია, ატყვევებს გერმანიას და ესვრის პოლიციას - ეს რეალური ამბის განსახიერებაა, რომელიც ტერორისტული ორგანიზაცია „წითელი არმიის ფრაქციას“ ეხება. რადიკალური ორგანიზაცია 1960-1970-იან წლებში აქტიურად ებრძოდა დასავლეთ გერმანიას, რის შედეგადაც 34 ადამიანი დაიღუპა. როგორც ჩანს, ამ სცენაში ლინდემანი ორგანიზაციის ერთ-ერთ დამფუძნებელს გუდრუნ ენსლინს თამაშობს.

მომავალი

ისტორიული სცენების მომდევნო კადრში ჩნდებიან კოსმონავტები, ხოლო აღმოსავლეთ გერმანიის ჩინოსნები ნამდვილ ორგიას მართავენ, რომელშიც გერმანელი კოსმონავტის ზიგმუნდ იენის ორბიტაზე პირველად გასვლას ზეიმობენ. შემდეგ სცენაში რაკეტა V-2 პირდაპირ საკონცენტრაციო ბანაკიდან მიფრინავს. სავარაუდოდ, ამით ჯგუფის წევრებს იმის თქმა სურდათ, რომ ნაცისტი გერმანელების მიერ შემუშავებული ტექნოლოგია, რომელსაც დღეს მსოფლიოს სასარგებლოდ იყენებენ, ბნელი წარსული აქვს. 

ვიდეოში ბევრი კოსმოსია და ასეთივეა ფინალი - ეს გერმანიის მომავალია, - ფიქრობენ ჯგუფის თაყვანისმცემლები. ვიდეოს ბოლოს, კოსმონავტები ორსულ გერმანიას ეფერებიან, ამის შემდეგ კი ის გაურკვეველი მიზეზების გამო ძაღლებს აჩენს და შემდეგ კვდება, ხოლო მისი ცხედარი კოსმოსში მიფრინავს. ზოგიერთ გერმანელს მიაჩნია, რომ ძაღლი, გერმანული ნაგაზის სიმბოლოა, რომელიც ქვეყანაში ყველას უყვარს.