ტოლკინის შთამომავლები აცხადებენ, რომ ავტორის შესახებ გადაღებულ ფილმთან კავშირი არ აქვთ

დღეს, 3 მაისს, დიდი ბრიტანეთის კინოთეატრებში ფილმ „ტოლკინის“ პრემიერა შედგება. „ბეჭდების მბრძანებლისა“ და „ჰობიტის“ ავტორზე გადაღებული ფილმის ირგვლივ დიდი ყურადღებაა მიპყრობილი და სკანდალის გარეშე ისტორიას არ ჩაუვლია. 

„ტოლკინის ოჯახის წევრებს და მის შთამომავლებს სურთ განმარტონ, რომ ამ ფილმის შექმნაში მონაწილეობა არ მიუღიათ და არც უფლება მიუციათ“, - ასეთი განცხადება გააკეთა ოჯახის ადვოკატმა. მათი თქმით, ფილმში გადმოცემული ავტორის ცხოვრების ისტორია ხშირ შემთხვევაში ტყუილია და რეჟისორის მხატვრული ჩანაფიქრის ნაწილია.

ჯონ რონალდ რუელ ტოლკინის მემკვიდრეები ხშირად გამოდიან თავიანთი წინაპარის საკუთრების დასაცავად. ასე მაგალითად „ბეჭდების მბრძანებლის“ სამყაროს მომავალი ეკრანიზაციიდან ჰონორარის მიღებას ითხოვენ. 

ტოლკინმა „ბეჭდების მბრძანებლის“ ეკრანიზაციაზე უფლების გაცემისთვის 1969 წელს 100 ათასი ფუნტი მიიღო, რითაც გადასახადები გადაიხადა. სწორედ ამიტომ, მის ოჯახს ამ ცნობილი ტრილოგიიდან, რომელმაც გაქირავებიდან 2 მილიარდ დოლარზე მეტი მიიღო, არაფერი ერგო.

ამჯერად, მწერლის შთამომავლები სასურველის მიღებას სასამართლოს საშუალებით გეგმავენ. მათ სწორება აქვთ მომავალ ტელესერიალზე, რომელზეც მოლაპარაკებები Amazon-თან და Netflix-თან მიმდინარეობს. ეს ტელესერიალი დიდი ალბათობით, ყველაზე ძვირადღირებული ეკრანიზაცია გახდება.